Eck Lenneke, Dyderikes vonn Reden elike husfruwe, bekenne opembar in dussem breve, dat Dyderick vonn Reden myn huser unde ek myt Ludolleffe vonn Netthe overeyn gekomen synth also umme mynes hushere gudere to Westelem belegen, so he de vonn dem proveste up dem Berghe vor Hildensem to lehne hefft unde ek darahnne eyne lyfftucht, by namen eynen meygerhove, twene kothove unde twe hove landes, so Hans Eckhagen dar sestich Rynsche gulden darahnne hadde, de ohme Ludolleff von Netthe weddergegheven hefft, unde Dyderick von Reden mynem husheren unde my furder twyntich gude vulwerige Rynssche gulden gehandelageth hefft, de wy to guder genoghen von ohme entfangen hebben unde in unse fromen unde nuth witliken gekarth, dar Dyderick von Reden myn hushere ome, synen erven unde holder des breves myt orem guden willen eynen breff over gegheven hefft, so denne myn hushere unde ek sodan golt to unsem besten unde unser erven von Ludolleffe von Netthe entfangen hebben, hebbe ek Lenneke vorbenomt myne lyfftucht, de ek hebbe an deme sulven gude, dem genanten Ludolleffe von Netthe, synen erven unde holder dusses breves myt orem guden willen vorkofft unde vorkope in krafft dusses breves vor de sulfften achtentich gulden, der Hans Echagen sestich unde Dyderick von Reden unde ek twyntich entfangen hebben, so dat ek der lyfftucht de wyle Dyderick von Reden myn hushere, ek effte unse erven de gudere von Ludolleffe von Netthe effte synen medebescrevenen na uthwysynghe Dyderikes von Reden breve Ludolleffe von Netthe unde synen medebenomten darover gegheven, von ohne nicht wedderkopen, neyne insage dohn wyllen unde my der lyfftucht nicht frauwen, sunder der guder Ludolleffe von Netthe unde synen medebenomten na uthwysynge mynes husheren breve rauwelken bruken gunnen unde staden. Dusses to orkunde hebbe ek Lenneke vorbenomt in affwesende Dyderikes vonn Reden mynes husheren Corde Holthgreven gebeden, umme syn ingesegell, in dem ek eynes eghen gebreck hebbe, dussen breff umme myner bede willen to vorsegelende. Des ek Cord Holtgreve so bekenne, dat ek myn ingesegell an dussen breff umme bede willen Lenneke, Dyderickes von Reden eliken husfruwen, in synen affwesende witliken hebbe gehangeth, na godes borth Veerteynhunderth iar darna in negenundenegentigesten iare, ame frygdage na Epiphaniam domini.