Ek Hermen Volkolt, to desser tyd voget to Hildensem mynes gnedigen heren bisschup Magnus, bekenne openbare in dessem breve under mynem ingesegele, dat vor mek, dar ek sat in gerichtestad in gehegedem gerichte to rechter dingtyd dages, quam Henning Mollen unde anklagede Hinrik Brunswik alse umme schapvel, de he under sek hedde, dede Hillebrandes van Lauwenstein horden, de he ome volgen laten scholde unde nemen wissene vor ansprake. Des bekande Hinrik vorbenomd, dat he de vel hedde und let seggen sinen vorspreken, he hedde darane vertein schillinge unde twene penninge, wan he ome de gheve unde dede ome wissene vor ansprake, so wolde he ome de vel volgen laten. Also dede ome de benomde Henning wissene vor ansprake mit sinem huse unde woninge, dar he nu inne wonet uppe der Smedestrate belegen unde vorstunt dat mit sinem rechten, dat dat benomde hus so ghud unvorpendet were, alse de erbenomden ware ghud were. Dit is aldus gehandelt in gerichte unde wort by gevaren mit vorspreken unde mit dingluden in aller wise, alse ordel unde recht utwisende is, unde ek Hinrik Wedekindes bekenne under mynem ingesegele, dat ek hire hebbe ein vorspreke to gewesen unde we Hans Wulffhagen de elder unde Hinrik Koning bekennet under usen ingesegelen, dat wy hire hebbet dinglude to gewesen, unde is geschen na godes bort Verteinhundert jar darna in deme negenundetwintigesten jare, des vrigdages neist na User Leven Vruwen dage orer gebort.