Wir Frantz von Asscheberg, Thumbher der Kirchen zu Hildesheimb und Obedientiarius zu Arebergenn, unnd David Pedeck, Vicarius S. Stephani daselbstenn, bekennen offenbar in diesem Brieff vor uns und unsere Nachkommen in derselben Obedientien und Vicarien, daß wir habenn belehnet und belehnenn gegenwordigenn inn Krafft dieses Brieffs mit Handt und Munde Bartholdt Helmeß zu Arbergenn als den Eltestenn seiner Vetteren unnd rechten Manerbenn mit einer halben Huffe Landts belegen uff dem Arberger Velde und einem Kothoff darselbest, so seine Vorfaren das inn Vorzeiten vor ein Lehenn gehabt haben unnd von Bartoldt Meyer uffgetragen, und einem Kothoffe, denn Hannß Lawenkopff zu Lehenn gehabt hat. Hir soll derselb Bartholdt Helmes unnser getrewe Man vonn seinn, unser Bestes wißen und Argstes warnen nach eußerstem Vermögenn, und wir wöllenn und sollenn dieses vorbeschriebenenn Gutts unnd Lehens seyn bekennige Herre unnd Wäre wesenn, warinne das Nott und Behuff ist und das von uns geeischett würde. Dieses inn Urkundt der Wahrheit habe ich Frantz vonn Asschenberg vorgenant mein Insiegell wißlich gehennget an diesem Brieff, deßenn ich David Pedeck auch alhie zu gebrauche, gebenn in Hildeßheimb nach der Geburtt Christi Tausent sechßhundertt unnd sechs, den 18. Decembris.