Von Gotts Gnaden wir Heinrich der Junger, Hernzog zu Braunschweig unnd Lüneburg etc., bekennen für unns, unnsere Erben unnd alsweme, das wir denn hochgelertenn unsern Rath, Cantzler unnd lieben Getrewen Johann Stoppler, der Rechten Doctorn, umb seiner vielen getrewen Dienst willen, die er unns viel jarhero gelaistet unnd noch laisten kann unnd mag, zu einem rechten Erbmanlehen mit Zubehueff seines Leibs manlichen Lehennserbenn mit allen den Güttern, so ettwann die Rauschenplat seligen von unns zu Lehen getragen unnd nach ihrem thottlichen Abganngk unns heimbgefallen sein, nemblich mit vier Hufe Landes zu Hilbrechtshausen unnd den Diennst uber das Dorff, den Danwedell unnd andere Holtzmarckt zu demselben Dorff behorig, noch mit vier Hufe Landes, einem Meirhof unnd dreien Kotthofen inn- unnd ausserhalb demselben Dorff belegen, noch mit ainem freien Burgklehen uff der Burgk zur Wintzenburg bei dem Beigersberg unnd darzu Wasser, Holtz unnd Weide zu gebrauchen, unnd mit ainem Gartten bei dem Stockhagen unnder der Burg, mit dreien Hufe Landes unnd zwen Hofen zu Eigershausen, frei Diensts unnd aller Pflicht, mit fünff Hufe Landes unnd sechs Hofen zu Ammensen, mit dreien Hufen Landes unnd dreien Kotthofen, mit zwei Stück Landes unnd zwei Stück Zehenden, alle belegen inn- unnd ausserhalb dem Dorffe zu Verdesser mit allen iren Zubehorungen, unnd mit ainem Hofe zu Westfelde, mit dem Dienst zu Hilbershausen mit der Vogtey inn- unnd ausserhalb dem Dorff, mit sechtzehen Hufen Lanndes, mit zweien Sattellhofen unnd acht Kotthofen frey mit Diennst unnd aller Pflicht, unnd mit ainem Walle als der daselbst begriffen ist mit dem Graben, unnd darzu zu gebrauchen der Holtzmarck inn dem Danwedell, mit dem Zehenden darselbst inn- unnd ausserhalb Dorffs, unnd mit der Schafferei darselbst, unnd mit Meindeshausen mit Zehenden unnd allen iren Zubehorungen, frei alles Diennsts, unnd mit ainer Fischerey uff der Leine uber unnd beneden der Mülen zu Ertzhausen, mit dem Diennst unnd aller Pflicht uber das Dorff zu Wolperode, mit ainem Meirhofe unnd vier Hufe Lanndes geheissen der Lindehofe, mit dem Zehenden darselbst inn- unnd ausserhalb dem Dorffe, auch mit der Schafferei darselbst unnd ainem Meirhofe genant der Clauwenser Hofe, mit vier Hufe Lanndes mit dem Zehenden frei alles Diennsts und Pflichte zu Clauwensen inn der Veldtmarck belegen zwischen dem Closter Brunshausen unnd Wolperode, noch mit ainer Wortt under dem Berge unnd ein zehendtfrei Hufe Lanndes zu Barvelde, unnd mit einer Hufe Lanndes zu Mechtshausen, auch mit allen Affterlehen, so aus disen Güttern verlehend, unnd auch den, so hier zu- unnd eingehorig sein, und allen iren unnd diser Gütter Zubehorungen, Nutz unnd Gerechtigkeitten, allermassen sie die Rauschenplat von unns zu Lehen gehabt haben, sollen unnd wollen gedachts Johann Stopplers unnd Doctors unnd seines Leibs manlichen Lehenserben solches Lehens rechter bekenniger Herr unnd Wher wesenn, wann unnd wo es vonnötten wurdet unnd wir darumb erfordert werden. Zur Urkundt haben wir unnser Einsigell vor uns unnd unnsere Erben an disen Brieff thun hengen, der geben ist zu Wulffenbüttell nach Christi Geburt im Fünftzehenhundertisten unnd sibenunndviertzigisten Jare, am Dinstag nach Michaelis Archangeli.