Wy her Ghert van der gnade goddes unde des stolles to Rome biscop to Hildensem bekennet openbare in dessem breve, dat wi belenet hebbet unde lenet Hartmanne van Lathusen den elderen unde sine erven mit dren houven to Geynsen mit aller tobehoringhe unde nut, de nu buwet Heyseke unde van usem stichte van rechte to lene gat, unde hebbed des to ener betughinghe use ingheseghel henkt in dessen bref, de gegheven is na goddes bort Dusent drehundert iar in dem viftenundeseventighesten iare, des hilghen daghes user vrowen alse se gebodescoppet wart.