Ich Rapolt der Luch tv^on chvnt allen den, di disen brief ansehent, daz ich durich got vnd durich vnser frawen willen vnd auch durich | der gu^ottæt willen, di mir daz haus datz Raitenhaslah hatt getant, han gegeben dem selben goteshaus mit salmans hant meinen aigen datz Rot^a, daz ist ainen hof vnd ain mv^el vnd ein lehen, daz haizzet datz Neidekke, vnd swaz dar zv^o geho^ert vnd swaz ich oder min vater da heten oder ie gewunnen, versv^oht vnd [vn]versv^oht^b, holtz, akker, wazzer, wismat, vischwaid, hofstet, vmbe drizzich pfunt Regenspurgær pfenning vnd driv pfvnt der selben mvnzze ze leitchauffe miner hausfrawen vnd meinen zwain swestern Chv^enigunt vnd Jevten vnd der selben kinden Andre vnde Engelram. Vnd sol mir daz selbe gotshaus geben alle jar, mir zv mein ains^c leib hvntz an minen tot fvmf vnd viertzich metzzen chorns vnd als vil habern gv^otes traides vnd ain halbez pfvnt Regenspurgaer pfenning vor sand Martins tag; vnd svlen auch mir das vorgenant gv^ot geantwurten an min mv^e fridlich vnd sicherlich, swo ich hin wil iner zwain rasten von Raitenhaslah. Vnd habent mir auch gegeben ain wis, div haizzet Hardærinne, in dem selben geding; afer nah minem^d tod sol daz vorgenant gu^ot gar vnd gæntzlich vnd ledichlich vnd div vorgenant vis beleiben dem selben gotshaus ewichlich frî vor meiner hausfrawen vnd aller min frivnt ansprach. Daz auch disiv red stæt beleih an chranchait, gib^e ich dem gotshaus hintz Raitenhaslah disen brief verinsigelt mit mein selbes insigel, an dem jar, da von vnsers herren geburt waren tausent jar zwain hvndert jar vnd zwai vnd nivntzich jar. Des sint getzivch: hern Chvnrat der pfarrær von Perchirchen^f vnd her Chvnr(at) ab dem haus, Ortlib der scherig, Libhart von alten Mvldorf, Wernhart, Jordan^g der Chrapf, Hainr(ich) Sesel, Vlreich von Halerprukke^h, Hainr(ich) von Laufenⁱ, hern Perihtoldes svn, Chvnr(at) ir probst von Gerihing^k vnd Rvdolf vnser wirt von Mvldorf vnd ander erbæriger lavt vil.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 447, S. 368-369