Ich Eberwein, Otten sun dez Cholben, vergich offenbar an disem brief allen den, | di in sehent oder ho^ernt lesen, daz ich mit meiner hausfraw^en vnd vnser paid erben vnd mit vnser aller frevnt rat vnd gantzem willen vns verzigen haben aller der ansprach vnd rechtes, di mein vater Ott der Cholb hat gehabt hintz dem gotzhaus von Raitenhaslach vmb vier phunt phenning, deu er offt gemelt hat in der stifft ze Westendorf, daz man im di gelten schult an der hu^eb ze Pru^enn, dev er emaln verchaufft hat, vnd^a im auch daz gotzhaus von Raitenhaslach nie chainez geltes noch ansprach vergehen hat^a; der selben ansprach vnd aller ansprach vnd rechtes, di wir haben hintz dem obgenanten gotzhaus vnd hintz allem seinem aigen, wo iz in dem land gelegen ist, verzeich wir vns gantzleich vnd ledichleich mit allen Sachen vmb di trew vnd genad, der ich wart von dem vor genanten chloster, daz mich der eberg herre abbt Fridreich stifft auf daz guet ze Sta^endelein ze pavmans recht ain jar vmb den dienst vnd vodrung vnd alle nu^etz, alz ander paula^ewt daz selben guet vor dient habent. Vnd wenn ich dem obgenanten abbt vnd dem gotzhaus ze Raitenhaslach auf dem selben guet nicht fueg, so schol ich dar ab varn an allen chrieg vnd ansprach vnd schullen si daz guet stifften alz ander ir freys aygen. Vnd daz disev handlung vnd sache dem gotzhaus ze Raitenhaslach gantz vnd sta^et beleib, dar vber gib ich in disen brief ze vrchunt versigelten mit anhangunden insigel hern Vlr(eich)^b dez Puechpechken pei der Ro^et, der daz nach meiner pet im vnd allen seinen erben an schaden dar^c an gelegt hat. Daz ist geschehen^c anno domini M^o.CCC^o. L., in die beatorum martyrum Fabiani et Sebastiani.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 745, S. 643-644