Chunradus Dei gratia Prepositus et Conventus Ranshovensis Ecclesie omnibus in perpetuum. Advertentes, quod salus hominum tanto amplius ampliatur, quanto institutiones sacre ad laudem Dei et sanctorum suorum reverentiam devotius conservantur, claustrum dominarum prope monasterium de novo duximus erigendum et observationem regularem abolitam in eodem ad vigorem pristinum reducere cupientes statuimus, ut in ipso claustro perpetuo VI. sorores et non plures, inter quas una per loci Prepositum ceteris prefici debeat in magistram, debeant militare, quarum quidem sororum numerus, nisi ex maxima et legitima necessitate non minuatur ex nulla causa infra ternarium reducendus. Ipse etiam sorores habitam deferent regularem, videlicet nigra suppelitia et nigra pallia a dorso eminentia ultra caput et sub frequenti clausura observationes salubres iuxta traditionem Sancte Regule observabunt. Statuimus etiam, ut nulla sororum predictarum per preces potentum assumafur sed tantum per nos eligatur et detur talis, quam nostra consideratio utilem reputaverit et honestam. Statuimus etiam, ut in ipso claustro nulla femina domicella vel vidua residere permittatur in habitu seculari, admittentes, ut famule domus et virgines, que manualia opera vel Psalterium discunt, vestibus Laicalibus licite uti possint. Obligamus etiam nos et successores nostros ad dandum ipsis sororibus prebendam solitam, qua mediante in divinis possint laudibus contiuue perseverare. In cuius rei testimonium presentes dedimus literas nostrorum sigillorum munimine roboratas. Datum et actum Ranshofen anno Domini MCCXCVI. in die S. Katarine.

Source Fulltext: OÖUB 4 (Wien 1867) S. 247-248, Nr. 274