Embricus Dei misericordia Herbipolensis Ecclesiae Episcopus omnibus Christi fidelibus salutem in perpetuum. Notum sit omnibus Christi fidelibus praesentibus et futuris hanc litteram inspecturis, quod quidam Regni ministerialis nomine Fridericus de Rota ob remedium animae suae ac pietatis intuitu Pontem in Wels, qui Eeclesiae et Episcopi Herbipolensis censualis extiterat, omnibus tam negotiatoribus quam viatoribus de longe seu prope venientibus ad transeundum liberum reddidit datis videlicet in concambium legitime eiusdem Wirtzburgensis Ecclesiae Vineis alijsque praedijs suis siue areis liberis, quas idem Fridericus in loco, qui Palsensce dicitur, et quod in libera possessione habuit per manum liberi hominis Herandi de Leope, suscepit autem hanc donationem Marchio de Stiria Ottakarus junior eiusdem Herbipolensis (sic) aduocatus, qui versauice pontem et eiusdem transitum, accessum et abscessum cum beneficio, quod Pehelin (Pezelini) dicitur, ipsi ponti adiacente in manum liberi hominis Albuini de Stein concessione et rogatu nostri Embriconis Wirtzpurgensis Ecclesiae Episcopi perpetuae libertati conseruandum ac tuendum tradidit. Nos itaque Embricus Wirtzpurgensis Ecclesiae Episcopus statuimus pleno iure nostra authoritate, quod, quaecunque sit spiritualis siue secularis idonea persona, quem senior pars Ciuium in Wels in magistrum eiusdem pontis et Rectorem elegerint, Idem Rector aduocatus sit et Judex super vniuersos redditus (?predii) Sancti Egidij, quod ponti dignoscitur attinere, nec omnino liceat alicui Judici prouinciali seu praeconibus in praeiudicium Pontinarij ius a nobis institutum aliquo modo infringere. Si vero ex aqua Trunae aut ex veteratione lignorum pons dilabatur, ex tunc omnibus, qui subsidium manu Eleemosynarum praedijs, areis, agris, alijsque Eleemosynis in Ecclesijs ad erectionem pontis dederint, authoritate Beatae Mariae et beatorum martyrum Kyliani et sociorum eius, qui in Ecclesia nostra patrocinantur, quadraginta dies eriminalium de iniuncta poenitentia in domino misericorditer relaxamus. Nos vero ad instantiam et petitionem Christianissimj viri praefati Friderici de Rota a Venerabilibus confratribus nostris talem obtinuimus indulgentiam, ab Archiepiscopo Salisburgensi quadraginta dies criminalium, a Domino Episcopo Frisiacensi (?) quadraginta dies criminalium, a Domino Episcopo Babenbergensi quadraginta dies criminalium, a Domino Episcopo Ratisponensi quadraginta dies criminalium de iniuncta poenitentia omnibus ponti subsidium eelemosynis suis conferentibus auctoritate patrocinium suorum in domino misericorditer relaxamus. Si qua vero, quae antea praemisimus, nunc ad memoriam reducimus Statuentes siquidem, si magister pontis ardua negotia tractare in praedio sancti Egidij habuerit, quae per se diffinire nequiuerit, Judicem ciuitatis et cum eo quatuor ciues meliores assumat, qui hoc negotium vna cum eo perducant ad effectum. Datum in Ecclesia Herbipolensi Anno Domini Millesimo Centesimo vigesimo octauo.

Source Fulltext: OÖUB 2 (Wien 1856), S. 171-172