In nomine sancte et indiuidue trinitatis. Reginbertus Dei gratia patauiensis episcopus, Quandoquidem in partem sollicitudinis ecclesiarum deo uolente uocati sumus, quantum de iure suscepti officii nostri possumus, diuinum cultum ampliare et deo seruientibus curam gerere intendimus. Uniuersis itaque Christi fidelibus notum esse uolumus tam futuris quam presentibus, qualiter iustis peticionibus dilecti nostri domini Ottonis de mahlant annuentes quasdam nostri iuris diocesianas ecclesias cum decimacionibus suis ecclesie sancti Johannis in sabenik contulimus eo, quod et ipse multis prediis suis aliisque rebus collatis eandem canonicorum regularium ecclesiam fundauerit nostreque dicioni subdiderit. Debitam quoque adhuc ei exhibentes recompensacionem quandam aliam ecclesiam in confinio montis, qui uulgariter hengist dicitur, de nouo nostra concessione fundatam cum uniuersis eorum, que iam culta sunt uel excolenda, decimacionibus adbibito quoque baptismi ac sepulture libero iure prefate ecclesie sancti Johannis ad usus et stipendia fratrum superaddidimus terminosque in hunc modum prefiximus et designauimus. A gaihstetin usque ad ecclesiam sancti Martini, Ab eadem ecclesia usque in uadum Gressenich, ab eodem uado per medium hohenberch usque in entischengrabin, Ab illo loco et ualle per descensum maioris trisnich usque in aridam trisnich, Ab inde usque in metam positi lapidis, Ab hinc usque in chlafinbach, In descensu chlafinbach usque ad metam alterius lapidis, Deinde usque in tiuphenbach et per meatum eiusdem riuuli usque in danubium. Idcirco autem predicte ecclesie taliter terminos designauimus, quia locus ille paulo ante saltuosus et incultus nullis diocesianis terminis inclusus fuit, unde nostre auctoritati terminos illi destinare de ratione licuit. Tale itaque nostre donacionis et constitutionis factum licet astipulacione coniuentium fratrum nostrorum et assensu populi magnum robur acceperit, ut plus tamen ratum in posterum et inconuulsum permaneat, priuilegio nostro muniuimus et sigilli nostri inpressione insigniri fecimus. Nomina uero eorum, qui tunc presentes aderant et qui huius rei testes exstiterunt, hec sunt: Gebehardus de purchusin, Chunrat de pilstein et filius eius friderich, Chunrat marchio, Oulrich de pernekke, Hartwic de haginuwe, Walther de traisme, Hartwic de rauna, Adelbreht et frater eius lupolt de stameheim, Adelram de chambe, Chunrat de rakez, Gebehart de chadehosesberge (sic), Marquart de Wesen, Rudeger camerarius, Sibot dapifer.||
Hec autem facta sunt Anno ab incarnatione domini Mill. C.XL. VI. in expeditione ierosolimitana Indict. VIIII.

Source Fulltext: OÖUB 2 (Wien 1856), S. 237-238