Lucius episcopus seruus seruorum dei dilecto in Christo fratri Regenbot Rectori hospitalis de Pahin Salutem et apostolicam benedictionem. Que a Christi fidelibus religiosis locis in pios usus fuerunt attributa, ne processu temporis aliquorum malicia subtrahantur, apostolico debent munimine roborari. Dilecta siquidem in Christo filia nostra nobilis mulier Beatrix de Chlamb predium quoddam iuxta littus danubii, quod Pahin dicitur, beato Petro sub unius aurei censu annis singulis exhibendo pie deuocionis intuitu obtulit et ibi hospitale ad peregrinorum usus et aliorum transeuncium construere cepit et Ecclesiam fabricare. Predium insuper eidem hospitali pro sua et suorum consanguineorum animarum salute de assensu nobilis mulieris Adelheidis filie ipsius et mariti eiusdem H. scilicet Comitis de Velburk et 0. filii eorum pia deuocione concessit, ut ibi, sicut diximus, peregrini ac transeuntes grata reperiant solacia karitatis. Nos autem ad peticionem eiusdem mulieris locum ipsum cum hiis, que inpresenciarum iuste et sine controuersia possidet uel in futurum concessione pontificum, largicione regum uel principum, oblacione fidelium seu aliis iustis modis prestante domino poterit adipisci, sub beati Petri et nostra protectione suscipimus et presentis scripti patrocinio comunimus. Terminos autem huius predii inferius duximus annotandos, uidelicet a riuulo, qui Chrewspach dicitur, per ascensum usque ad ruptum castrum domine Helchin, Item a summitate moncium, sicut nix labitur et ymbres fluunt, usque in alueum danubii. Redditus eciam prefato loco datos et attinentes uidelicet super monte, qui latine sella sed uulgariter Satel dicitur, octo mansus et octo, quibus Perhart et filii eius et Ditericus inbeneficiati erant, et duos mansus, quibus Welocto inbeneficiatus fuit, Item nemus Dachsperg, Item Elmpach tres mansus, Hundorf nouem, Hohenwert duos mansus, Teuffenpach nouem, Stranlindorf duos mansus, quos Gotfridus de Siboto possedit et tercius, quem Delricus et filius eius Alram possedit, et quartus, quem Wikman et Reginger possedit, et ager et nouella, quam Rudolf et Chunigunt et Gerunch possederunt, Item uineam unam Cremse, que a Gotschalco empta fuit, Item uineam unam Entenberg, quam habuit delreoth, suar et ger, Item Rubindorf unam villicalem curtim et tres vineas cum agris ad vineas pertinentibus, quibus vinee coli debent, sicut Otlo et Wernher et Alber de Momenlach possederat. Item enstale in villa, que Obelach dicitur, que Walchun de Chlamb et uxor eius Beatrix ibidem possedit et que Heinricus et Arnoldus in beneficio accepit, duodecim mansus predicto hospitali authoritate apostolica confirmamus et presentis scripti patrocinio comunimus. Nulli ergo omnino hominum liceat hanc paginam nostre protectionis et confirmacionis infringere uel ei ausu temerario contraire. Siquis autem hoc attemptare presumpserit, indignacionem omnipotentis Dei et beatorum Petri et Pauli apostolorum eius se nouerit incursurum. Datum Velletr. III. Idus aprilis.

Source Fulltext: OÖUB 2 (Wien 1856), S. 394-395