CELESTINUS episcopus seruus seruorum dei Dilectis filiis Rapotoni Prouisori et habitatoribus noui hospitalis in alpibus diocesis Patauiensis constituti salutem et apostolicam benedictionem. Sacrosancta Romana ecclesia deuotos et humiles filios ex assuete pietatis officio propensius diligere consueuit et, ne prauorum hominum molestiis agitentur, eos tamquam pia mater protectionis sue munimine confouere. Eapropter dilecti in domino filij deuotionem uestram, quam ad nos et beatum Petrum habere noscimini, attendentes personas uestras et quascumque possessiones uel quecumque bona idem hospitale impresentiarum iuste et canonice possidet aut in futurum iustis modis prestante domino poterit adipisci, sub beati Petri et nostra protectione suscipimus et presentis scripti patrocinio communimus. Decernimus ergo, ut nulli omnino hominum liceat hanc nostre paginam protectionis infringere uel ausu ei temerario contraire. Siquis uero hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Cunctis autem eidem loco sua iura seruantibus sit pax domini nostri Jesu Christi, quatenus et hic fructum bone actionis percipiant et apud districtum iudicem premia eterne pacis inueniant. Datum Laterani. iiij. Kalendas februarij, Pontificatus nostri anno tercio.

Source Fulltext: OÖUB 2 (Wien 1856), S. 444-445