CELESTINUS episcopus seruus seruorum dei uniuersis Christi fidelibus per Salzburgensem, Patauiensem et Gurcensem dioceses constitutis Salutem et apostolicam benedictionem. Quoniam, ut ait apostolus, omnes stabimus ante tribunal Christi recepturi, prout gessimus in corpore siue bonum siue malum, oportet et nos diem messionis extreme misericordie operibus preuenire et eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, quoniam, qui parce seminat, parce et metet, et qui seminat in benedictionibus, de benedictionibus et metet uitam eternam. Sane peruenit ad audientiam nostram, quod nouum hospitale in alpibus sit Patauiensis diocesis domino permittente constructum, in quo pauperibus et infirmis caritatis solacia ministrantur, verum quia ad huiusmodi misericordie opera indigentibus eroganda proprie non sufficiunt facultates, deuotionem uestram rogamus, monemus attentius et in remissionem uobis iniungimus peccatorum, quatenus cum eius nuntij ad uos accesserint elemosinas petituri, grata eis subsidia conferatis ita, ut uestro mediante suffragio operibus ualeat insistere caritatis et uos per hec et alia bona, que domino inspirante feceritis, ad eterne felicitatis mereamini gaudia peruenire. Datum Laterani. III. Kalendas februarij, pontificatus nostri anno tercio.

Source Fulltext: OÖUB 2 (Wien 1856), S. 445-446