Celestinus episcopus seruus seruorum dei dilectis filiis Etichoni Preposito Ranshouensis ecclesie beati Pancratii Martiris eiusque fratribus tam presentibus quam futuris regularem uitam professis in perpetuum. Religiosam uitam eligentibus apostolicum conuenit adesse presidium, ne forte cuiuslibet temeritatis incursus aut eos a proposito reuocet aut robur, quod absit, sacre religionis infringat. Ea propter dilecti in domino filii uestris justis postulationibus clementer annuimus et prefatam ecclesiam beati Pancratii Martiris, in qua diuino mancipati estis obsequio, sub beati Petri et nostra protectione suscipimus et presentis scripti priuilegio conmunimus. Inprimis siquidem statuentes, ut ordo Canonicus, qui secundum deum et beati Augustini regulam in eadem ecclesia institutus esse dinoscitur, perpetuis ibidem temporibus inuiolabiliter obseruetur.Preterea quascunque possessiones, quecunque bona eadem ecclesia in presentiarum iuste et Canonice possidet aut in futurum concessione Pontificum, largitione regum uel principum, oblatione fidelium seu aliis iustis modis prestante domino poterit adipisci, firma uobis uestrisque successoribus et illibata permaneant. In quibus hec propriis duximus exponenda uocabulis: Ecclesiam ipsam beati Pancratii martiris cum decima et iure parrochiali Capellam sancti Michahelis in eodem loco sitam, Capellas Niunchirchen, Handenberge, Geroldesberge et Capellam in monte sancti Egidii et Capellam Sancti Stephani protomartiris in Brunowe, cum pertinenciis earum, Capellam Hobercha cum pertinenciis suis in ea libertate, in qua bone memorie Eberhardus Salzburgensis Archiepiscopus uobis scripto proprio rationabiliter confirrnauit, ut videlicet nullus in eis preter ipsum Archiepiscopum et dyocesanum episcopum et ecclesie uestre prepositum aliquid debeat ordinare, quicquid iuris in Capellis per quascunque regiones a ministerialibus rationabiliter ecclesie uestre concessum est, Ror videlicet in confinio Cremsmunster, in Capella Nosbach in parrochia Altheim et Niunchirchen in parrochia Zeidlarn et in aliis in vicino uel in longinquo a iure parrochiali liberis, sicut est hactenus obseruatum, presenti uobis pagina confirmamus. Terminum quoque eiusdem ecclesie sancti Pancratii, quemadmodum recolende memorie Heinricus secundus imperator romani imperii cum episcopis suis scilicet Deitmaro Archiepiscopo Salzburgensis ecclesie et Beringero Patauiensis ecclesie episcopo et Niceno Laodicensis ecclesie episcopo cum aliis tredecim episcopis duxit prouide statuendum, et Cvnradus secundus romanorum rex scripto suo autentico eidem ecclesie confirmauit, incipientem videlicet de Ethenowe vsque Grvu^ozensewen et Greben et Bibenbach, Rantwinsbrunnen quoque inde ad Iden, Ratperch quoque et viwersengen et Berchsteig, Rechingen utique et Hulwern et Cangeren quoque per forinam semitam Capelle (sic) sancti Georgii martiris, deinde swarzgreben et vsque Owernbach, deinde per Adelbrchtsberc, deinde per Bv^ochchirchen, deinde in flumine Mateha, sicut in antiquis uestris priuilegiis continetur et usque ad hec tempora noscitur obseruatum, uobis et eidem ecclesie uolumus et apostolica auctoritate precipimus inuiolabiliter obseruari. Sane noualium uestrorum, que propriis manibus aut sumptibus colitis siue de nutrimentis animalium uestrorum nullus a uobis decimas exigere uel extorquere presumat. Crisma uero, oleum sanctum, consecrationes altarium, ordinationes clericorum, qui ad sacros ordines fuerint promouendi, a dyocesano suscipietis episcopo, siquidem catholicus fuerit et gratiam atque conmunionem apostolice sedis habuerit et ea uobis gratis et absque prauitate aliqua uoluerit exhibere, alioquin ad quencumque malueritis antistitem gratiam et conmunionem apostolice sedis habentem libere recvrratis, qui nostra fultus auctoritate uobis, que postulantur, inpendat. Obeunte uero te nunc loci eiusdem Preposito uel ad alterius ecclesie regimen transeunte, siue tuorum quolibet successorum nullus [450] ibi qualibet surreptionis astucia seu uiolentia preponatur, nisi quem fratres conmuni consensu uel fratrum maior pars consilii sanioris secundum dei timorem et beati Augustini regulam prouiderint eligendum. Ad hec quum locus uester sic est institutus, ut aduocatus bonorum ducis Bawarie in partibus illis eiusdem quoque loci sit aduocatus, prohibemus, ut nec ipsi nec alicui subministro eius liceat eundem locum iniustis grauaminibus infestare, sed eum vice iam dicti ducis, sicut ipse instituit et scripto suo firmauit, cum mancipiis et possessionibus eius idem aduocatus defendere ac tueri debet eo tenore, ut querimonias tam uestras quam mancipiorum uestrorum audiat et congruam iusticiam faciat, dum modo tales sint cause, que forum ecclesiasticum non requirant. Paratam uero nullam a uobis propter hoc exigat sed tantum de orreo ducis, qui tempore fuerit, secundum antiquam institutionem tempore suo accipiat. Super hec idem aduocatus in claustro uel mancipiis aut possessionibus uestris nullam disponendi habeat potestatem. Exactiones quoque indebitas super uos uel super mancipia uestra a quoquam fieri penitus inhibemus. Sepulturam quoque ipsius loci liberam esse decernimus, ut eorum deuotioni et extreme uoluntati, qui se illic sepeliri deliberauerint, nisi forte exconmunicati uel interdicti sint (satisfiat?) salua tamen iusticia illarum ecclesiarum, a quibus mortuorum corpora assumuntur. Decernimus ergo, ut nulli omnino hominum liceat prefatam ecclesiam temere perturbare aut eorum possessiones auferre uel ablata retinere, minuere seu quibuslibet vexationibus fatigare, sed omnia integra conseruentur eorum, pro quorum gubernatione ac sustentatione concessa sunt, usibus omnimode profutura salua sedis apostolice auctoritate et dyocesani episcopi canonica iusticia. Si qua igitur in futurum ecclesiastica secularisue persona hanc nostre constitutionis paginam sciens contra eam temere uenire temptauerit, secundo tercioue conmonita, nisi reatum suum congrva satisfactione correxerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore et sanguine dei et domini redemptoris nostri iesu christi aliena fiat atque in extremo examine diuine ultioni subiaceat. Cunctis autem eidem loco sua iura seruantibus sit pax domini nostri iesu christi, quatenus et hic fructum bone actionis percipiant et apud districtum iudicem premia eterne pacis inueniant. Amen. Datum Laterani per manum Cencii Sancte Lucie in Orthea dyaconi Cardinalis domini pape Camerarii III. Kalendas Maii Indictione XIII. Incarnationis dominice M. C. XC. quinto, Pontificatus vero domini Celestini pape III. Anno quinto.

Source Fulltext: OÖUB 2 (Wien 1856), S. 448-451