In nomine sancte et indiuidue trinitatis. Wolfkerus Dei gratia Patauiensis episcopus omnibus Christi fidelibus in perpetuum. Episcopalis officii esse dinoscitur, Venerabilia et Religiosa loca pio amore complecti et eorum iustis postulationibus gratum impertiri consensum. Quapropter venerabilis fratris nostri Friderici abbatis de Boumgartenberge et fratrum illius peticioni acquiescentes et necessitudinem adtendentes omnem decimationem, que nos contingebat de curte ipsorum, quam colunt in Harde, praedicto abbati eiusque successoribus et fratribus ibidem deo famulantibus legitime tradidimus receptis in concambio ad usus ecclesiae nostrae quatuor curtilibus, quorum duo sita sunt in Steinbuhel, tercium in Rutprehteshouen, quartum in herstorf. Et ut haec nostra traditio firma et inconuulsa permaneat, praesentem paginam conscribi fecimus et sigilli nostri impressione roborauimus. Testes etiam, qui publicae nostrae actioni huic interfuerunt, propriis nominibus annotari praecepimus: Hartwicus de lengenbach Ratisbonensis ecclesiae aduocatus, Hademanis de Chunringen, Wichart de Zebingen, Irnfrit de Gnannendorf, Otto de haselowa, Ulricus Struno, Rudolfus de Chirchlingen. Siqua igitur ecclesiastica saecularisue persona contra hanc nostrae traditionis paginam uenire temptauerit, si secundo tercioue comonitus non emendauerit uel resipuerit, iram omnipotentis dei incurrat. Acta sunt autem haec anno ab incarnatione domini M. C. XC. V. Indictione XIII. Praesidente Sanctae Romanae ecclesiae domino papa Celestino anno Pontificatus eius V. Imperante domino Heinrico Imperatore inuictissimo Anno Imperii ejus V. Anno uero Pontificatus nostri Quinto VIII. Kal. Augusti In loco, qui dicitur Wienna.

Source Fulltext: OÖUB 2 (Wien 1856), S. 452-453