Wolfkerus Dei gratia Pataviensis Episcopus omnibus Christi fidelibus affectum Karitatis in Domino. Cum Ecclesia conventualis Sancti Petri in Erlah ab Ecclesia Pataviensi ex antiquo predita dono decimarum tam in Parrochia ad Sanctum Valentinum iuxta fluentum Erlah fluminis sita quam in Parrochia vocata Heresinge et eadem in ceteris predictarum terminis Ecclesiarum eiusdem doni longeva possessione et mancipio continuo potiretur, emersit aliquando super dictis decimis particularis quaestio coram nobis. Quidam enim ambarum Parrochiarum antedictarum incole concipientes in earundem partibus Parrochiarum extirpationem siluarum suarum et efficientes ibidem agros fructiferos de iam perfectis ibidem tunc novellis prouentuum adcrescentium decimas debitas dicte Ecclesie subduxerunt. Cum autem per Venerabilem dicti loci Abbatissam Alhaidim talis sue iniurie fieret propositio in nostra presentia, ipsa Abbatissa per effectum iusticie optinuit Ecclesie sue omnes eas decimas, de quibus tunc questio fuit orta, eas videlicet decimas per omnia loca ambarum Parrochiarum sepe dictarum, qui Riutzehent vulgariter appellantur. Ut igitur obtentus predictorum coram nobis tam effective patratas de nostre procurationis debito perpetuata stabilitate ab omnibus amodo permaneat inconcussus, apponimus sigillum nostrum huic pagine testibus etiam quibusdam tunc rei geste presentibus annotatis. Testes: Hainricus et Ernestus fratres de Truna, Pruno de Zierberch, Wernhardus de Wizenberch, Heinricus et Vlricus fratres de Gruenberch, Rudigerus et Sighardus Fratres cognominati Pibir, Otto Gallus cognomine, Heinricus de Mistilbach, Heinricus de Lonstorf, Ruodolfus de Chremsdorf, Rafoldus, Eberhardus de Altenhouen, Wichpoto et Herbordus de Erlah, Chunradus et Otto ibidem et alii quam plures. Acta sunt hec in Ebilsperch Anno ab Incarnatione Domini M. C. LXXXXVI. anno Pontificatus nostri VI. Kalendas Mai.

Source Fulltext: OÖUB 2 (Wien 1856), S. 455-456