IN nomine sancte et indiuidue trinitatis. Notum sit omnibus presentis et futuri temporis filijs, qualiter lis, qui (sic) inter canonicos s. Nycolai et dominum Ortolfum de Griezchirchen fuit pro decima quadam terminata est. Predictus Ortolfus in barrochia Griezchirchen decimacionem sue agriculture a multis temporibus in sua tenuit potestate nullum huius vsurpacionis ad prefatos canonicos habens respectum. Tandem cum dominus Heinricus Salzburgensis canonicus ad regimen monasterij sancti Nycolai constitutus fuit, iam dictus Ortolfus super tam iniusta possessione a prenominato preposito sepius est commonitus, cuius ammonicione conpunctus ad consensum boni consilii inclinatus (est) Pretaxatam itaque decimacionem idem Ortolfus in manum domini Heinrici prepositi resignauit, quam ipse ad tempus vite sue non iure beneficij sed iure amicicie a preposito accepit. Insuper tradidit sepedictus Ortolfus beato Nycolao et Canonicis eiusdem loci predium nomine Tegerbach, quod conparauit a Manegoldo X. talenta (sic), quod nullo iure nec uxori sue nec filijs attinebat, pro remedio anime sue ipsumque predium in beneficium a manu prepositi recepit ad tempus vite sue ea lege, ut singulis annis V. nummos ad altare sancti Nycolai deferat et ipso ex hac uita decedente et supra scripta decimacio et iam dictum predium in usum s. Nycolai et canonicorum ipsius loci redeat. Instabat etiam tunc tempus, quod dominus prepositus romam pro necessitate loci et in seruicio episcopi ire debuit, qui cum expensas itinerarias ex dominicalibus suis habere non posset, ex consilio tocius congregacionis a supra dicto Ortolfo mutuo accepit X talenta Ratisponensis monete et VI. ensensis monete hoc pacto, ut in natiuitate sancte Marie ensarios sibi reddat et in festo s. Martini Ratisponenses. Inseruit eciam idem miles huic conuencioni, ut si ipse infra prescriptum spacium ex hac uita decederet, idem debitum pro anima sua sic partiretur; V. talenta ratisponensis (monete) fratribus s. Nycolai, tria canonicis maioris ecclesie, duo pauperibus ad sanctum Egidium, ensensium duo talenta ad Willehringen, ad duo altaria in ecclesia Griezchirchen duo talenta, ut per hec utilitas illius ecclesie secundum consilium prepositi s. Nycolai et fratrum suorum disponatur, reliqua duo in potestate sint domini prepositi danda pro redempcione anime sue. Huius rei testes sunt Otto ameiz, Erchenger de Uahtersheim, Hecelo de tegerbach Milites domini Ortolfi Engelbertus, Wasigrim, Chunrat de Awe, Porn de tolet, Irnfridus de cherbach, Dietmar et Gezman et frater eius Dietmarus de cherbach et alii quam plures, Walther, Syboto, Diemar, Erchenger, Chunrat pictor, Wizman et filij eius Perchtolt, Pernolt, Perchtolt.

Source Fulltext: OÖUB 2 (Wien 1856), S. 530-531