Fridericus dei gratia Romanorum Imperator Semper Augustus Jerusalem et Sicilie Rex. Tunc Imperialis Excellencie firmissimo robore firmatur Imperium, tunc decus extollitur Cesaree Maiestatis, cum Infidelibus pro perfidia penam digne retribuit et pro fide fidelibus premia liberaliter elargitur, Amorque uirtutis tunc crescit in bonis et pene fragor in malis acuitur, cum Iniustorum diuitijs ditantur et induuntur innocentes quodammodo spolijs dampnatorum. Hac igitur consideratione permoniti, qui Romani frena Imperij moderamur, attendentes quoque puram fidem et deuotionem sinceram, quam Otto Comes palatinus Reni et Dux Bawarie dilectus Princeps noster ad Excellentiam nostram gerit, necnon et grata ualde ac fidelia seruitia, que Culmini nostro incessanter exhibet et exhibere poterit inantea gratiora, Considerantes etiam manifestam perfidiam, quam Otto Dux Meranie proditor noster adherendo rebellibus nostris contra nos et Imperium proditorie conmisit, Comitatus de Nuemburch et Scherdingen, quos idem Dux Meranie a nobis et Imperio tenuit, prefato Ottonj Comiti Palatino Reni et Duci Bawarie et heredibus suis masculis cum omnibus Juribus et pertinentijs suis de gratia nostra duximus in perpetuum conferendos, ut seruire proinde nobis et Imperio teneantur. Ad hujus autem concessionis nostre memoriam et stabilem firmitatem presens Scriptum fieri et Maiestatis nostre Sigillo iussimus conmuniri. Datum in Castris in depopulatione Parmensi per manus Magistri Petri de vinea Imperialis aule prothonotarij et Regni Sicilie Logothete Anno dominice Incarnationis Millesimo Ducentesimo, Quadragesimo Octauo, Mense Junij VI. Indictionis.

Source Fulltext: OÖUB 3 (Wien 1862), S. 145-146, Nr. 145