Gregorius Episcopus Seruus Seruorum Dei dilectis filiis Abbati Monasterii de Meten eiusque fratribus tam presentibus quam futuris regularem uitam professis in perpetuam rei Memoriam. Religiosam uitam eligentibus Apostolicam conuenit adesse presidium, ne forte cuiuslibet temeritatis incursus aut eos a proposito reuocet aut robur, quod absit, sacre Religionis infringat. Ea propter, dilceti in Domino filii uestris justis postulationibus clementer annuimus et monasterium de Meten Ratisbonensis Diocesis, in quo diuino estis obsequio mancipati, sub beati Petri et nostra protectione suscipimus et presentis scripti Priuilegio communimus, inprimis siquidem statuentes, ut ordo Monasticus, qui secundum Deum et beati Benedicti Regulam in eodem Monasterio institutus esse dinoscitur, perpetuis ibidem temporibus inuiolabiliter obseruetur. Preterea quascunque possessiones, quecunque bona idem Monasterium impresentiarum juste et canonice possidet aut in futurum concessione Pontificum, largitione Regum uel Principum, oblatione fidelium aut aliis justis modis prestante Domino poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabulis: locum ipsum, in quo prefatum Monasterium situm est, cum omnibus pertinentiis suis, Villam Methen uulgariter appellatam cum hominibus, redditibus, Jurisdictione temporali ac omnibus appenditiis et pertinentiis suis, Ecclesiam in Nivvenhausen, quam in usus proprios juste et canonice obtinetis, cum omnibus pertinentiis suis, Passagium in Danubio, Decimas, agros, terras, Possessiones, redditus et quicquid Juris ab utraque parte Danubii Monasterium uestrum noscitur obtinere; Capellam cum monte St. Pauli, Villam in Perge cum silua, agris, pascuis et aliis pertinentiis suis. In Wimpenzingen unam Curiam in villis et prediis ante Nemus et in nemore sitis decem et octo mansos, In Rodelsdorp quinque mansos cum molendino, in Villa Wischelburch sexdecim mansos cum areis, ortis, agris, molendino, prato; in Insula Danubii, quod uulgariter dicitur Wert, Piscariam a loco Wischelburch usque ad locum, qui teckendorf uulgariter nuncupatur, cum pertinentiis suis, in Buzenhouen unum Mansum, in Ratolsdorf unum mansum, agros et areas, in Paschingen unum mansum, in sutarn quatuor predia cum agris et areis, in friendorf quatuor predia cum agris et areis, in Haunhouen curiam cum agris, pratis, pascuis et omnibus suis pertinentiis, in Rottenmanne unam curiam, in Endorf quatuor predia cum agris et areis, in Heunrichsdorf unum predium, in Esindorf curiam cum agris, pratis, pascuis et omnibus pertinentiis suis, in Azingen quatuor curias, quatuor mansos, agros et areas cum omnibus pertinentiis eorumdem, in laichlingen unum predium, in Wihse agros et areas, in Pulvvis quatuor mansos et unum predium cum pertinentiis suis, in Hochenraine duas curias et quatuordecim mansos cum agris et pratis, pascuis, areis et omnibus pertinentiis suis, in Rinchouen quinque mansos, unum predium, agros et areas, in Hordorf prata cum agris et prediis, in Painchouen sex predia et decimam duorum prediorum, in Empschouen unum mansum, in obernror curiam, agros et areas cum decima unius curie et aliis pertinentiis suis, In Nidernror curiam, agros, prata et pascua cum omnibus appenditiis et pertinentiis, in Vttenchouen tria predia cum agris et areis, Jus Patronatus in Ecclesia Puche cum manso et decima, in Vttenchouen quatuor mansos, in Rotenbach tres agros cum decima, in Staufferdorf duos mansos et unum predium cum agris et areis, in Perchhaim duos mansos, tria predia, agros et areas cum decima, in Vempach agros, in Aschhain unum mansum, in tribichingen unum predium, in minori Ponigon unum predium apud flumen Isaram, prata, ortos et agros, In Ratispona unam domum et duodecim areas, Decimam apud Vilsam in villis, que Prunne, Arldorf, lauphartsdorf, Pushausen, Chalstorf et Munchin uulgariter nuncupantur, Decimam apud Esindorf, in Haidolfingen et in aliis villis et curiis adiacentibus, Decimam apud Strubingam, in Chirmehtingen, Suntzingen et in Geltolfingen, Decimam in Hernsingen, Pirchelprunne, Geckingen et in tiernpuch, in Diocesi Patauiensi Decimam apud flumen traisem, in Nuzdorf et in aliis villis de vineis et agris, in Chremis unam curiam et unam vineam, que uulgariter Hartkat appellatur, in Geislindorf vineas et quosdam redditus, qui uulgariter dicuntur Purchrecht, in Pachen vineas, ortos et areas, In Rossazzen et Rugersdorf vineas, ortos, Pomaria, areas et agros, villam de Isinrichesdorna, cum hominibus, iurisdictione temporali, curiis, mansis, prediis, siluis, redditibus, agris, areis, pratis, pascuis ac omnibus ad dictam villam spectantibus et capellam, quam extra villam ipsam habetis, in Ascha vineas, unam Domum, passagium, areas, ortos et agros cum prediis et omnibus pertinentiis eorumdem, In Patauia unam Domum, liberum Descensum in Danubio de Monasterio uestro in Chrems et asscensum de Chrems ad Monasterium uestrum; In Diocesi eistettensi villas, homines, terras, possessiones cum pertinentiis eorumdem ac universa jura, que in Pago Svvanueld Monasterium uestrum noscitur obtinere, cum terris, pratis, vineis. nemoribus, usuagiis et pascuis, in Bosco et plano, in aquis et molendinis, in uiis et semitis et omnibus aliis libertatibus et immunitatibus suis. sane noualium vestrorum, que propriis manibus aut sumptibus colitis, de quibus aliquis hactenus non percepit, siue de uestrorum animalium nutrimentis nullus a vobis decimas exigere vel extorquere presumat. Liceat quoque vobis Clericos uel Laicos liberos ac solutos e seculo fugientes ad conversionem recipere et eos absque contradictione aliqua retinere. Probibemus insuper, ut nulli fratrum uestrorum post factam in Monasterio uestro Professionem fas sit sine abbatis sui licentia de eodem loco nisi arctioris Religionis obtentu discedere. Discedentem vero absque communium litterarum uestrarum cautione nullus audeat retinere. Cum autem generale interdictum terre fuerit, liceat vobis clausis januis, exclusis excommunicatis et interdictis, non pulsatis campanis suppressa uoce diuina officia celebrare, dummodo causam non dederitis interdicto. chrisma uero, oleum sanctum, consecrationes altarium seu Basilicarum, ordinationes Clericorum, qui ad ordines fuerint promouendi, a diocesano suscipietis Episcopo, siquidem catholicus fuerit et gratiam et communionem sacrosancte Romane sedis habuerit et ea uobis uoluerit sine prauitat aliqua exhibere. Prohibemus insuper, ut infra fines Parrochie uestre, si eam habetis, nullus sine assensu diocesani Episcopi et uestro capellam seu Oratorium de nouo construere audeat saluis Priuilegiis Pontificum romanorum. Ad hec nouas et indebitas exactiones ab archiepiscopis et Episcopis, decanis et archidiaconis aliisque omnibus Ecclesiasticis secularibusque personis a uobis omnino fieri prohibemus. Sepulturam quoque ipsius loci (liberam) esse decernimus, ut eorum deuotioni et extreme uoluntati, qui se illic sepeliri deliberauerint, nisi forte excommunicati sint uel interdicti aut etiam publici usuarii, nullus obsistat, salua tamen justitia illarum Ecclesiarum, a quibus mortuorum corpora assumuntur. Decimas preterea et Possessiones ad ius Ecclesiarum uestrarum spectantes, que a laicis detinentur, redimendi et legitime liberandi de manibus eorum et ad Ecclesias, ad quas pertinent, reuocandi libera sit uobis de nostra auctoritate facultas. Obeunte vero te nunc eiusdem loci Abbate uel suorum quolibet successorum nullus ibi qualibet surreptionis astutia seu uiolentia preponatur, nisi quem fratres communi consensu uel fratrum maior pars consilii sanioris secundum Deum et beati Benedicti Regulam prouiderint eligendum. Paci quoque et tranquillitati uestre paterna in posterum sollicitudine prouidere uolentes auctoritate apostolica prohibemus, ut infra clausuras locorum seu Grangiarum uestrarum nullus rapinam seu furtum facere, ignem apponere, sanguinem fundere, hominem temere capere uel interficere seu uiolentiam audeat exercere. Preterea omnes libertates et immunitates a Predecessoribus nostris Romanis Pontificibus Monasterio uestro concessas nec non libertates et exemptiones secularium exactionum a Regibus et Principibus uel aliis fidelibus rationabiliter uobis indultas auctoritate apostolica confirmamus et presentis scripti Priuilegio communimus. Decernimus ergo, ut nulli omnino hominum liceat prefatum Monasterium temere perturbare aut eius Possessiones auferre uel ablatas retinere, minuere seu quibuslibet uexationibus fatigare, sed omnia integra conseruentur eorum, pro quorum gubernatione ac sustentatione concessa sunt, usibus omnimodis profutura salua sedis apostolice auctoritate et Diocesanorum Episcoporum canonica Justitia et in predictis decimis moderatione concilii generalis. Si qua igitur in futurum Ecclesiastica, secularisue persona hanc nostre constitutionis paginam sciens contra eam temere uenire temptauerit, secundo tertioue commonita, nisi reatum suum congrua satisfactione correxerit, potestatis honorisque sui careat dignitate reamque se diuino iudicio existere de perpetrata iniquitate cognoscat et a sacratissimo corpore et sanguine Dei et Domini Redemptoris nostri Jesu Christi aliena fiat atque in extremo examine districte subjaceat ultioni. Cunctis autem eidem loco sua Jura seruantibus sit Pax Domini nostri Jesu Christi, quatinus et hic fructum bone actionis percipiant et apud districtum Judicem premia eterne Pacis inueniant. Amen, amen, amen. Ego Gregorius Catholice Ecclesie Episcopus subscripsi. Ego Simon tituli sancti Martini Presbiter Cardinalis subscr. Ego Ancherius tituli sancte Praxedis subscr. Ego frater Johannes ... Episcopus subscr.||
Ego Petrus tusculanus Episcopus subscr. Ego uicedomnus peneffentus Episcopus subscr. Ego frater Petrus ostiensis et veletensis Episcopus subscr. Ego Otto bonus sancti Adriani Diaconus Cardinalis subscr. Ego Jacobus sancte Marie in cosmydin Diaconus Cardinalis subscr. Ego Gottofridus St. Georgii ad uelum aureum Diaconus Cardinalis subscr. Ego ubertus St. Eustachii Diaconus Cardinalis subscr. Datum Lugduni per Manum Magistri Lanfranci Archidiaconi Pergamensis, sancte romane Ecclesie uicecancellarii Kalendis Aprilis, Indictione tertia, Incarnationis dominice anno MCCLXXV. Pontificatus uero Domini Gregorii Pape X. anno quarto.

Source Fulltext: OÖUB 3 (Wien 1862), S. 425-429, Nr. 465