Wir Albrecht von Gotes genaden herzoge von Osterich vnd von Steir, herre von Chrain, von der windichens marche vnd von Portenawe veriehe vnd tuen chvnt allen Leuten, die disen brife sechent oder horent lesen, daz vnser liber getrewer vlrich von Chappelle vns geliehen hat fu^emphe vnd sibenzch march alter wienner wiennichs geletes vnd habe wir im dor vmbe gesast vnser vogtay daze achwinden inner dorfs vnd auzsers dorfs mit allem dem zins, der do von gehort, dez zwen vnd fumphzich mezen habern sint vnd zwen vnd fumphzich phenninge, vnd mit allem dem recht, als si pey alten zeiten her chomen ist in vnser gewalt pey vnsern vorvaren den fuersten von Osterrich, daz er dye selben vogtay, als siv benant ist, so lange inne habe zephande, vnze wir oder vnser nachomen im oder sein erben di vorgenante fv^emphe vnd sibenzich march wider geben, auch gebe wir demselben vlrichen den zins vmbe sein dinst, daz er den habe mit gueter gewizsen an sunde vnd in auch habe mit vnserm gueten willen vnuerzalt, daz im sines hauptguetes, des wir im schuldige sin, do von nicht abge. dor vber gebe wir im ze einer stet vnd vrchvnde disen brif versigelt mit vnserm insigel. Der brif ist gegeben ze wienne an sand Mathevs abent, do man zalt von Christes gebuert Tausent zwaihundert zway vnd neunzich jar in dem nezstem jar dar nach.

Source Fulltext: OÖUB 4 (Wien 1867), S. 193, Nr. 210