In nomine Domini Amen. Ego Vdalricus de Weichseln notum esse cupio Vniuersis presentes audituris literas seu lecturis, quod evolutis plurimis annis, antequam emissem hereditatem seu forum Khirchschlag Dominus Woko pie memorie dictus de Krummau dedit et contulit domui B. Virginis in Plaga Patauiensis diocesis pro damnis illatis et remedio anime sue ecclesiam in Khirchschlag cum tribus plenis mansis in foro ibidem in Khirchschlag ad dotem spectantibus pleno iure et omni libertate nullis pactis et condicionibus interpositis libere et absolute in perpetuum possidendam. Ergo ego predictus Vdalricus, ex quo emi predictam hereditatem volo, vt nulli super his dubium oriatur, quod Ego nullam habeo ambagibus pretermissis justitiam nec aliquis heredum ac successorum meorum habere debebit in jam dictam Ecclesiam in Khirchschlag aut in bonis ipsius Ecclesie supradictis sive in judiciis vel exactionibus seu in aliis quibuscunque grauaminibus faciendis, nisi quod sine omni vtilitate et eciam grauamine Plebani, quemcunque Prepositus jam fate Domus B. Virginis ibi locauerit, sicut bona propria pro peccatis nostris tenebimus defensare. Si autem, quod absit, per me aut per aliquem heredum seu successorum nostrorum secus attentatum uel actum fuerit, Prepositus prescripte Domus B. Virginis uel Plebanus de Kirchschlag se defendere poterunt et debebunt presencium testimonio literarum. Vt autem prescripta robur habeant firmitatis, presentes literas dedi Domui B. Virginis in Plaga et fratribus ibidem Sigilli Domini mei Heinrici von Rosenberg et mei proprii appensionibus fideliter roboratas. Huius rei testes sunt Waczlaus Purgrauius de Rosenberg, Wisco procurator, Traianus, Pribislaus, Philippus fratres de Lebnicz, Elblinus, Busco, Jaclinus fratres dicti de Horrach, Busco de Rubn, Dworzata de Cypin, Dominicus de Passawerschlag Nicolaus de Dworzatschlag et alii quam plures. Datum anno Domini m. ccc. jn translacione B. Nicolai Episcopi et Confessoris.

Source Fulltext: OÖUB 4 (Wien 1867), S. 344, Nr. 369