Wier Chvnegund vnd Moechthilde Hern Seifrides tochter von Haslowe vnd begemenne vrowen ze Moernberch in dem Chloster verehen vnd tv°n chvnt allen den, die disen Brief sehent oder horent lesen, die nv sint vnd hernach chvmftich werdent, Daz wier noch vrowen Reichkart vnser Basen hern Seiffrids witiben van Moernberch rat ledichleichen vnd willichleichen geben vnd haben gegeben vnserm Bruder Wulfingen allez daz Gv°t, daz wier solden haben ze Osterreich vnd ze Steyr, vnd verzeichen vns des darvmb, daz er vns hat gegeben datz Gotteinspunn fvmf phvnt geltes wienner Munzze datz Nevsidel vnd dafz Imtzeinstorf, fumfhalphvnt geltes derselben Mvnzze, Einen weingarten vnd daz berchrecht auf dem winner Perge, vnd geben im dar vmb disen Brief mit des Conuents Insigel van Moernberch vnd mit vnserr Basen vrov^en Reichkart der witiben van Moernberch Insigel versigelt zv einer ewigen gehugnusse diser sache vnd mit den gezewgen, die hie geschriben stent: Hern albrechtn dem Stuchsen van Trautmanstorf ze den zeiten Lantrichter in Osterreich, Hern Otten vnd Hern Chadolden den Brudern van Haslowe, vlrichen dem Pergower, Stephan dem Stuchsen, Otten van wiennerherberg, Hern Haimen von Trautmanstorf, Hern wulfing van Gotteinspunn vnd andern biderben levten, den dise sache wol chvnt vnd gewizzen ist. Diser Brief ist gegeben datz Trautmanstorf des Phintztags var dem Svntag Letare, da van Christes Burt waren Drevtzehen Hundert Jar vnd des nechsten Jares dar nach.

Source Fulltext: OÖUB 4 (Wien 1867), S. 378-379, Nr. 410