Ich wernhart von Harthaim tvn chvnt allen den, di disen brief ansehent vnd in lesen horent, di nv sint vnd her nach chvmftich sint, daz ich mit miner Tohter Agnesen gv^etem willen die Hvebe datz Gvmpolting vnd swas dar zv gehoret, gegeben han vu°r reht Aigen dem Erbern manne herrn Heinrich von Walsse vnd sinen Erben vnd svllen vnd wellen ovch wir Ich vnd min Tohter Agnes der vorgenunten Hv°b des vorgenanten hern Heinrichs von Walsse vnd siner Erben gegen aller ansprach scherme vnd geweren sin nah des Landes reht vnd gewonheit; Ist aber, daz wir des niht tv°n,Swelichen schaden er vnd sin Erben do von nement, den sol er vnd sin Erben haben of alle, daz wir haben in dem Lande. Daz disev rede stêet vnd vnvercheret beleibe, dar vber gib ich wernhart von Harthaim dem vorgenanten herrn Heinrich von walsse vnd allen sinen Erben ze einem vrchvnde disen brief mit meinem Insigel vnd di gezevge, der namen hie geschriben sint, Daz ist her vlrich von Chappelle vnd der Chvnrat von Chappelle, Her Eberhart, her vlrich, her friderich von walsse, Her wichart, her Alber von Polnhaim, Gvndacher vnd Rvger von Storchenberch, Hadmar vnd Alber von Schonenberch, der Otte vnd der Hainrich von Zinzendorf, Peter von Harthaim, Dietreich vnd Alber von Pilchtorf. Diser brief ist gegeben nah vnsers Herren Christi gebvrde vber Tavsent, Drev Hvndert Jare in dem Ersten Jare, dar nah an vnser vrowen Tage ze der Liehtmesse in der Stat ze Ens.

Source Fulltext: OÖUB 4 (Wien 1867), S. 375-376, Nr. 407