ICH Alber von Rvhenstain vergihe vnd tvn chvnt allen den, die disen prief lesent oder horent lesen, die nv lebent vnd hernah chvnftich sint, Daz ich mit gvtem willen vnd mit verdahtem mv°te vnd mit zeitigem Rat meiner frivnde vnd avch mit ir gvnst vnd mit ir willen verchavft han meins rehten Aigens meinen tail, den ich gehapt han an dem Havse Rv^egerspvrch mit alle dev, vnd dar zv gehorent ze Holtz, ze velde vnd ze dorf, iz sei gestift oder vngestift, versvcht oder vnversvcht, swie so daz genant ist, daz han ich alles geben vmb zwai Hvndert March lo^etiges Silbers wienner gewihtes Ane Dreizehentehalbe March, des ich reht vnd redlichen gewert bin, meinem lieben gesweien hern Vlrichen von wallsee vnd seiner havsvrowen vern Diemvden vnd allen irn Erben ledichlichen vnd vreilichen ze haben vnd allen irn frvmen da mit ze schaffen, verchavfen, versetzen vnd geben, swem sie wellen an allen irresal vnd bin avch ich Alber von Rvhenstain des vorgenanten gvtes meins gesweien hern Vlriches von walsse vnd seiner havsvrowen vern Diemvden vnd aller ir Erben rehter gewer vnd scherm fvr alle Ansprache, als Aigens reht ist vnd des landes gewonhait ze Steyr. Vnd dar vber dvrch pezzer sicherhait so setz ich vorgenanter Alber von Rvhenstain dem vorgesprochen meinem gesweien hern Vlriche von Walsse vnd seiner havsvrowen vern Diemvde vnd allen irn Erben Alles mein gvt, daz ich han dazv dem Albereh an vrvar, an werden, an vischwaide, swie so iz genant ist vnd meinen weingarten, der da leit ze Gvmpolzchirchen, der da haizzet der Ramstainer zv samt mir vber daz vorgenant gvt ze rehtem scherme fvr alle Ansprache nah des landes rehte ze Steyr Also mit beschaidner rede, swas meinem gesweien hern Vlrichen von Walsse vnd seiner havsvrowen vern Diemvden vnd allen irn Erben rehtes landes schermes vber daz vorgenant gvt an mir ab get, daz suln si haben avf dem vorgesprochen meinem gvte da zv Alberch vnd avf dem vorgenanten meinem weingarten, der da haizzet der Ramstainer, der da leit ze Gvmpolzkirchen, vnd gib in dar vber disen prief ze Ainem sihtigen vrchvnde vnd ze Ainem offen gezivge vnd ze Ainer ewigen vestnvnge diser sache versigilten mit meinem Insigil. Vnd sint avch des gezivg vnser herre Grave Perhtolt von Rabenswalde, her Herman der Marschalch von Landenberch, her Livtolt von Chvnringen, her Stephan von Meyssawe, her vlrich von Chappelle, her Albreht der Stuchse von Travtmannestorf, her Vlrich von Wolfgerstorf, die ze den zeiten Lant Rihter waren jn Oesterreich, her Eberhart, her fridrich, her Hainrieh die prvdere von Walsse, her Otte von Zelkingen, her Hainrich von Liehtenstain, her Otte von Liehtenstain, her Otte sein svn vnde Ander bidirbe levte genvch, den diser chavf wol chvnt ist. Diser prief ist geben ze wienne, do von Christes gebvrt waren ergangen Twsent jar, Drev Hvndert iar, jn dem Ersten jare dar nah des Mittichens jn der Oster wochen.

Source Fulltext: OÖUB 4 (Wien 1867), S. 383-384, Nr. 416