Ich Rvger der Hayhenpech vergieh vnd tvn chunt allen den, die disen prief sehent oder ho^erent lesen, do iz da zv° chom, daz ich alles mein gv°t meinem herren Pisscholf Wernharten von Passawe verchauft vnd wolt varen gegen O^esterreich zv meinem aydem hern Weicharten von Topel vnd zv meiner tochter, Da besant ich di Valchenstayner Chalhohen vnd seinen svn Heinreichen vnd ich antwurt in alles daz gv^et datz Horaw vnd datz wantschaben vnd swaz da zv° geho^ert versvchtz vnd vnversvchtz, daz vnser vrowen Gotzhavs datz dem Slag von meinen vorvodern vnd von mir ze rechtem selgeraet worden vnd gegeben ist gantz vnd gar, vnd han ich den vorgenanten payden Valchenstaynern vnd irn erben auf den vorgenanten gv^etern ze einer bestaetigung gegeben sechzig phunt vnd zwaihvndert phunt Passawer phenning in ir hant Also beschaidenleich, daz si dez oftgenanten gv^etz datz Horaw vnd datz wantschaben trager sv^ellen sein dez Gotzhavs vnd versprecher fv^er alle ansprach aller meiner erben. Vnd han ich den Valchenstaynern auf dem selben gv^et geschaft ze einem vrchv^end alle jar zehen phenning ze Chv^enigstewer Passawer mv^ens. Vnd daz daz staet vnd vnzerbrochen beleib, Darvber gib ich disen prief versigelten mit meinem hangvnden jnsigel. Dez sint gezevg die Valchenstayner Chalhoch vnd Heinreich sein svn, fridreich vnd Chunrat ir vetern, Levpolt von Morspach, Chv^enrat Magenhavs, Ott der Chrotendorfer, Pv°rchel von Valchenstayn vnd ander erber lev^et genvg. Der prief ist gegeben, do man zahlt von Christes geburd drewtzehen hvndert jar vnd dar nach in dem andern jar An dem Liechtmesse tag.

Source Fulltext: OÖUB 4 (Wien 1867), S. 407-408, Nr. 438