Ich Vlreich von waltse hovbetman in Steyer vergih offenlichen an disem brief vnd tvn chvnt allen den, die in ansehent oder ho^erent lesen, daz vrow Herrat dev erber abtessin von go^esse aht hub dacz Pevl vnd ain hvb in Haslaech, der sei vnd ir gotshovs her Albreht von Pvchaim zwir gewaltichlichen vor entwert het, vor mein ze Ivdenbvrch in dem Lantaiding an sand Ambrosen toch mit recht behabt hat, vnd gab ich in ze boten darv^eber hern Hainreich von Stubenberch, der macht sei des selben gvtes gewaltich an meiner stat. Des sint gezeuge die erbern herren her fridreich der abt von sand Lampreht, Her Engelbreht der Abt von Admu°nd, her Ott von Liehtenstein, her fridreich von Petawe, her Hainreich von Stubenberch, her fridreich der wolfsawer, her Chvnrat abem graben, her Albreht der Lantscreiber in Steyer, Aecherl auz der Gevl, Ditmar der weizzenchircher, wergant von Micheldorf, Walchun von Go^esse vnd ander biderb levt genvch, vnd han ich ze ainem vrchu^ende disen brief darv^eber geben mit minem insigel versigelt. Der brief ist geben ze Judenbvrch nach christes gebvrt v^eber Tovsent drevhvndert iar vnd in dem andern iar an dem vorgenantem tach.

Source Fulltext: OÖUB 4 (Wien 1867), S. 411-412, Nr. 443