Wir Rvdolf von gotes gnaden Hertzog van Osterich vnd van Steyr, Herre van Chrayn, van der Marich vud van Portenawe veriehen vnd tvn chvnt allen den, di disen Brief sehent oder horent lesen, Daz dev Erber vrowe Elzbeth Graven Perchtrams van Mertestorf, dem Got genad, Wittwê den Vierden tail an dem Havs ze Rorawe vnd allez, daz dar zv geho^ert, Lavt oder Gv^et, da vmb sei vnser getrewer Vlreich van Walse van sein selbs wegen, ir Swester Sv^en wegen Grafen Pvzat vnd Niclosen brudern van vngern het an gesprochen var vnser in dem Lanttaiding ze Nevnburch, den vorgenanten vlreichen vnd den Graven ir Swester Sv^en an behabt hat in der Sehranne vnd in enbrosten ist recht vnd redleich mit vrag vnd mit vrtail, da gegenwu^ertich sint gewesen vnser lieben getrewen Stephan van Meyssaw Marschalch in Osterich, Herman Marschalch van Landenberch, Alber van Puchaym, Ott van Haslaw°, Chalhoch van Eberstorf, Sipot, Erkenprecht vnd Haydenreich bruder van Gors, Ott van Celking vnd ander erber Lavt. Der brief ist geben ze Nevnburch enhalb Tvnaw, Da van Christes geburd waren Tausent Jar, drev Hvndert Jar, darnach in dem dritten Jar des Mitichens noch sand Mathyas tach.

Source Fulltext: OÖUB 4 (Wien 1867), S. 432-433, Nr. 468