Ich Otte van dem Staine vergihe vnde tu^en chvnt allen den, di disen Prief ansehent oder ho^erent lesen, di nv lebent oder Hernach chvnftich sint, Daz ich mit gv^etem willen ze der zeit, do ichz wol getuen mohte, Han gesazt Hern Chvnraten von Rezzinge vnd seiner Hausvrowen vron perchten vnd seinen Erben meinen Hof daz celle mit alle dev, vnd darzv^e gehoret, ze rehter satzvnge fvr fvnftzich phvnt wienner phenninge mit meins Herren des erwaeren Pyscholf Chvnrats hant van Regenspurch, van dem ich den vorgenanten Hof ze Lehen han vnd van seinem GotsHaus, Mit der beschaidenhait, ob . . r vorgenant Her Chvnrat van Rezzinge oder sein Erben den Halben Hof datz weizzenchirchen, den ich im mit meiner Hausvrowen vron Margreten gv°tem willen vnd mit aller meiner erben gv°tem willen han ze chouffen geben, mit dem rehten verlu^ern, swanne daz geschiht, So schol der vorgenant Hof datz Celle sein vnd seiner erben rehtev Satzvnge sein fvr dev vorgenanten fvnftzich phvnt wienner phenninge. Daz disev rede also staet vnd vnzebrochen beleibe, darvber so gib ich vorgenanter Otte van dem Stain Hern Chvnraten van Rezzinge vnd seinen erben disen prief versigelten mit meinem jnsigel zeinem sihtigen vrchv^ende vnd zeiner staeten sicherhait vnd zeiner ewigen vestenung diser sache Mit den Gezevgen, di Hernach geschriben sint: Her friderich von Hausekke, Her Otte der zelkinger van Schala, Her Ludweich van zelkinge, Her Chvnrat van Schevrnberch, Her Otte van zinzendorf, Her vlreich van Perwart, Her Heinrich van zinzendorf, Marchart van zinzendorf vnd ander piderbe Levt genvege, den disev sache wol chvnt ist. Ditz ist geschehen vnd der prief geben datz Pechelarn, do van Christes Gebv°rt waren ergangen Drevtzehen Hvndert iar vnd darnach in dem dritten iar des Sampztages in der Osterwochen.

Source Fulltext: OÖUB 4 (Wien 1867), S. 434-435, Nr. 470