Ich Chvnrat von Svmerowe Tvn chvnt an disem prief allen den, die in sehent vnd ho^erent lesen, di nv lebent vnd hernoh chvnftich sint, Daz ich mit miner havsfrowen vron Agnesen vnd mit aller miner erben gvtem willen vnd mit ir gvnst vnd mit verdohtem mvt vnd zter zit, do ich iz wol getvn mohte, verchavft han mines rehten chavf aigens daz Purchstal ze Sevsenekke vnd ein mul vnder dem havse vnd den Hof ze Grv°be vnd daz halbe holze dacz dem Chvnigesperge vnd ander Holcze vnd Chravtgarten vnd swaz zv dem vorgenanten Purchstalle vnd zv dem vorgenanten hof gehöret ze Holcze vnd ze velde, besvhte vnd vnbesvhte, verlehent vnd vnverlehent, swi iz genant ist, daz ich von hern Arnoltes des Pybers hovsfrowen vnd von ir chinden ze Aigen gechavft het, das selbe gu°t han ich alles mit allem dem reht, als ich iz her praht han, in rehter gechavfter aigens gewêr gegeben vmb vierzich pfvnt pfenninge wienner mv^enze, der ich reht vnd redelich gewert pin, dem Erbern Manne hern Hainrich von walsse vnd allen sinen Erben vreilich vnd ledichlich ze haben vnd ir frvmen damit ze schaffen, ze verseczen, ze verchavffen, ze geben, wem si wellen, an allen irresal, vnd han ich daz ovch getan mit mines werden herren Herzogen Rvdolfes in Oesterriche guten willen vnd mit siner genedigen gvnst, wand er daz vorgenant gu°t mit allem minem andern gu°t do in siner gewalt het. Dar vber durch bezzer Sicherheit So setze ich mich mit allev dev, daz ich han, dem vorgenanten hern Heinrichen von walsse vnd allen sinen erben vmb daz vorgenant gut ze rehtem scherme vnd ze geweren fv^er alle ansprache, als aigens reht ist vnd des landes gewonheit in Oesteriche, vnd gib in darvber ze einem vrchv^ende vnd ze offem gezevge disen prief, der mit minem Insigel vber dise sache bestaetiget ist. Des sint gezevge der Stephan von Meissowe, der Chvnrat vnd der Seibot von potendorf, der Chalhoh von Ebersdorf, der Eberhart vnd der Vlrich vnd der Friderich die bruder von walsse, der Otte vnd der Alber von volchenstorf, der Hainrich vnd der Chvnrat von volchenstorf, der Vlrich vnd der Dietrich von Pilihdorf, der Chvnrat von Chappelle, der weichart vnd Reinpreht von Pollenheim, Alber von Chvnringe, Alber von Pilihdorf, Hadmar vnd Alber von Schonenberch, Gvndacher vnd Rvger vnd Johans von Storchenberch. Der prief ist gegeben nah vnsers herren Christi gepvrte vber Tavsent vnd Drevhvndert Jar, darnah in dem dritten Jare An sant Georgentage.

Source Fulltext: OÖUB 4 (Wien 1867), S. 437-438, Nr. 473