Ich Wilhalm der Paiger vnd ich Peterss sin Havsfrowe wir veriechen an disem brief allen den, di in sehent vnd lesen horent, di nv lebent vnd her nah chvmftige sint, daz wir mit vnserr Erben gvtem willen vnd mit ir gvnst vnd mit verdahtem mv^et vnd ze der zeit, do wir is wol getvn mohten, verchauffet haben vnsers rehten Aigens ein viertail an dem Havs ze Sevseneke vnd einen Hof ze Arnoltstorf. daz vorgenant gu^et alles haben wir gegeben mit allem dem reht, Als wir is herbraht haben in rehter Aigens gewêr vmbe Aines vnd Sehzich phvnt phenning winner Mvnsse, der wir reht vnd redelich geweret sin, dem Erbern manne herrn Hainreich von walsse vnd allen sinen Erben vreileich vnd ledichleich ze haben vnd allen ir vromen da mit ze schaffen, ze verchauffen, ze versetzen, ze geben swem si wellen an allen irresal. Vnd dar vber dvrch besser sicherhait si setzen wir vns ich wilhalm der Paiger vnd ich Peterss sin Havsfrowe vnd ich Otte des vorgenanten wilhalmes brv^eder vnverschaidenleich herrn Hainreich von walsse vnd allen sinen Erben vmbe daz vorgenant gv^et alles ze rehtem Scherme vnd ze gewêren vu^er alle Ansprah als Aigens reht ist vnd des Landes gwonheit in Oesterich, Vnd geben in dar vber disen brief ze einem vrchvnde vnd ze einem offenne gezevge diser Sache mit vnsern insigeln vnd mit hern Eberharts vnd mit hern Friderichs von walsse insigeln vnd mit hern vlreichs vnd mit hern Dietreichs vnd mit hern Albers von Pilhtorf insigeln vnd mit hern Hainreiches von Zinzendorf insigel, di diser sache gezevge sint mit ir Insigeln, vnd sint des gezevge avch der Chvnrat von Chappelle, der Hainreich vnd der Chvnrat von volchenstorf, der Otte vnd der Alber von volchenstorf, der weichart vnd Reimbreht von Polnhaim, Alber von Chvnring, Gvndacher vnd Rvger vnd Johans von Storchenberch, Hadmar vnd Alber von Schonenberch. Der brief ist gegeben, do vergangen waren von vnsers Herren Christi gebvrde Tavsent Jare vnd Drevhvndert iare, dar nah in dem dritten Jare ze winne an sant Georgen tage.

Source Fulltext: OÖUB 4 (Wien 1867), S. 436-437, Nr. 472