Ich Dietreich Schench von Dobra tvn chvnt Allen den, di disen brief Ansehent vnd in lesen horent, di nv sint vnd her nah chvmftich sint, daz ich mit miner brv°der herrn Sifrides vnd vlreichs gvtem willen gegeben han vmbe Sehs phvnt phenning, der ich gewert bin, dem Erbern manne herrn Hainrich von walsse vnd sinen Erben Ane Dreizich phenning fvmf phvnt verlichens geltes, daz êe min Lehen gewesen ist von minem werden Herren dem Hertzogem Rvdolf von Oesterich. Des selben gv°tes het von mir Charl von Hermanstorf einen Hof ze Owe, der dienet zwelf schilling, Friderich der Pecheim drev Lehen ze Chapphaimen, di dienent ein phvnt phenning vnd vlrich von Herbortendorf drei Schilling geltes ze Herbortendorf, Des Imlvnges chint von Steir fvmf schilling geltes ze Dennefurt, Otte von Drister uch Ainlef schilling geltes. Dar vber lob ich, daz ich des vorgenanten gvtes sol vnd wil des vorgenanten hern Hainrichs von walsse vnd siner Erben scherme vnd gewer sin gein aller Ansprach nah des Landes reht vnd gewonheit. Daz disev rede stet vnd vnverchert beleibe, dar vber gib ich im herrn Hainrich von walsse vnd sinen Erben ze einem vrchvnde disen brief mit minem Insigel vnd di gezevge, der namen hie geschriben sint, Daz ist her Eberhart, her vlreich, her friderich von walsse, Her weichart, her Alber vnd Reinprecht von Polnhaim, her vlreich, her Ditrich vnd Alber von Pilhtorf, Hadmar vnd Alber von Schonberch. Der brief ist gegeben nah vnsers Herren Christi gebvrt vber Tavssent Drev Hvndert jare, dar nah in dem Dritten Jare des Svnnetages vor der Liehtmesse.

Source Fulltext: OÖUB 4 (Wien 1867), S. 430, Nr. 465