WIr Chunrat der Polle zeden (zeiten) Purgermaister vnd der Rat von der Stat ze wienne veriehen an disem prief vnd tv°n chvnt allen den, di nv lebent vnd hernach chvnftich sint, Daz der Erber man her Rvger an dem Witmarcht vnser Pvrger mit gvnst vnd mit willen aller siner Erben dvrch reht Ehaftno^et, als er vor vns hat bewert mit zwain Erbern mannen hern Paltram dem Vatzen vnd mit hern Vlrichen sein saelbes svn, sein Havs an dem Witmarch, da er inne was, hat verchavft vmbe Hvndert Phvnt vnd vmbe zwaintzich phvnt vnser Phenninge, der er reht vnd redlichen gewert ist, dem Erbern Herren hern Eberharten von Waltse vnd siner Havsvrowen vnd allen sinen Erben ewichlich zehaben an alle ansprach, ze verchauffen, ze versetzen vnd ze geben, swem si wellen vnd allen iren frvmen da mit ze schaffen an alle irresal. Daz disev rede vnd diser Chavf also staete beleib, des gebe wir zevg vnd ze vrchvnd disen Prief mit vnser Stat jnsigil versigilt. Diser prief ist geben ze wienne, da von Christes gepvrt waren ergangen Drevzehen Hvndert Jar, darnach in dem vierden Jar an sand andres abent.

Source Fulltext: OÖUB 4 (Wien 1867), S. 468-469, Nr. 504