Ich Alber von Lobenstein vergiche vnd tvn chvnt An disem brief Allen den, die in sehent vnd ho^erent Lesen, di nv sint oder noch chv^enftik werdent, Daz ich meinem Lieben pru°der Petern, ovh von Lobenstein, gegêben han ze chovffen allen meinen Eribteil daz Arnstorf, der mich von minen vodern an geuallen was, iz sein weingarten, Hofstet oder purchreht, besv°cht vnd unbesv°cht, swaz ich han gehabt, daz han ich im Petern gegeben mit meiner Hovsfrowen willen vnd aller miner chinde, so daz er iz fu^erbaz, er vnd sein nachvnft, haben sol an allen chriek vnd an alle ansprach, vnd daz hie benant gut han ich im bestaet mit mines herren hant des pischolfs von Salzpurch mit aller der staet vnd ich ims ze reht bestaetgen sult, vnd daz im daz also staet belibe vnd vnuerchert, des gibe ich im Petern minem pruder vnd siner nachvnft disen brief mit minem Insigel versigelt vnd besta^ett vnd mit den zivgen, di da pei gewesen sint, Peter der Piber von dem weinperige, Rudger von Roteneck, Her Chalhol vnd weichart pru^eder von Pernowe, Dietel wenisch, Meinhalbe von wu^epling, Vlrich von Gersperch, wernhart der Graspech, Albreht pei dem tor vnd ander vil, di pei waren. Diez ist geschehen, do von christes gepurde waren tovsent Jar, Drei hvndert Jar dar nach in dem fv^enftem Jar, an sande mathias tak ze Lobenstein.

Source Fulltext: OÖUB 4 (Wien 1867), S. 475, Nr. 511