Ich Albrecht der Havtzenpekh vergih vnd tvn chvnt Allen den, Die disen prief sehent vnd horent lesen, die nv sint vnd hernach chvnftich werdent, Daz ich mit miner Erben gvtem willen vnd mit verdahtem mvt zter zit, do ichs wol getvn mohte, verchavft han meins rechten Aigens den Hof halben datz Salveterre vnd swaz zv dem selben halben hof gehoret ze holtz vnd ze velde, besv^eht vnd vnbesv^ehte, verlehent vnd vnverlehnt, swi ez genant ist, Hern Hainrich von walsse vnd sinen Erben vreilich vnd ledichliche zehaben vmb sehs vnd drizzich pfvnt pfenning wienner Mvnzz, der ich reht vnd redlich gewert pin Also, daz si ir frvmen da mit schaffen svln an allen irresal. Darvber dvrch bezzer sicherheit so sez ich mich mit Allem dem, vnd ich han, dem vorgenanten hern HainRich von walsse vnd sinen Erben vmb den vorgenanten halben Hof ze rehtem scherme vnd ze gewêren fvr alle ansprache, als Aigens reht ist vnd des Landes gewonheit in O^esterriche, vnd gib in darvber disen prief ze einem vrchvnde vnd ze einem gezevge gevestent mit minem Insigel vnd mit hern Chvnrats Insigel von Chappelle vnd mit hern Otten Insigel von Lonstorf. Dez sint gezevge her Heinrich von ||
Volchenstorf, her Hainrich von Lonstorf, der Gvndakker von Losenstein, Heinrich vnd Reicher von Hvsendorf vnd ander edel warhaft Levte. Daz ist geschehen, do man zalt von vnsers herren Christi gepvrte Tavsent vnd Drev hvndert Jar, in dem fvnften Jar des nehsten Svnnetages vor weinohten.

Source Fulltext: OÖUB 4 (Wien 1867), S. 496-497, Nr. 532