Ich Otte der Payger vergich vnd tvn chvnt allen den, die disen prief sehent oder horent lesen, Daz ich mit verdahtem mvt vnd mit gvtem willen hern Hainrichen von walsse vnd sinen Erben gegeben han ze rehtem aigen allez daz reht, daz ich an Sevsenek gehabt han vnd wil ovch des selben aigen ir gewer sein an aller stat, als man Aigens zereht gewer sein sol. Dar vber han ich in gegeben disen prief ze einem sichtigen vrchunde gevestent mit minem anhangendem Insigel. Des sint gezevge her Eberhart von walsse, her Heinrich von volchenstorf, her Chvnrat von Chappelle, her Heinrich von Lonstorf, der Ott von Lonstorf, her Ott von zinzendorf, der vlrich von grvnenpvrch vnd ander edel levte. Daz ist geschehn, do man zalt von Christes gepvrte Tausent vnd driv hvndert jar in dem sehsten jar vor Lichtmesse des nehsten Svnnentages.

Source Fulltext: OÖUB 4 (Wien 1867), S. 497, Nr. 533