Ich Rv^eger von Storchenberch vergiche vnd tun chvnt an disem brief allen den, di in sehent vnd ho^erent Lêsen, di nv sint oder noch chv^enftik werdent, Daz ich meinem liebem pru^eder Gvndackern mit gu^etlichem willen vnd mit vereintem mv^et ze chovffen han gegeben vmbe sv^ebenzik phvnt phennig wienner mv^enzz alle mein weinwachs vnd alle mein weingarten ze spicz, di mich von minen vodern vnd von minem saeligem vater angeuallen waren ze meinem teil vnd an geêrbet heten, vnd swaz zv denselben weingarten geho^ert, besu°cht vnd vnbesv^echt, iz (sei) hofstet oder Povngarten oder Aecker sin oder wismat, vnd oc swi sev min vater in nvcz vnd in gewêrn her vncz an sin ende praht, Also han ich sev gegêben minem pru°der Gundackern im vnd siner Hovsfrowen frovn Alheiden vnd ir chinden, so daz ich noch dehein mein nahchvnft fu^erbaz deheinen chriek noch dehein ansprach nach disem hie benanten weingarten niht haben sol, vnd nach alle dev vnd ich ze spicz han gehabt an nach verlihem gu°t ein, von dem ich niht gestanden pin, vnd den walt vber al an dem Jaurnik han ich im oˇh zv disen weingarten gegêbn. vnd daz wandluug also staet belibe vnd vnuerchert, dez gib ich im Gundackern vnd sinen êrben disen brief mit minem Insigel versigelt vnd bestaet vnd mit den zivgen, di da pei gewêsen sint: Her Heinrich von Lonstorf, mein pru°der Johannes von Storchenberch, Haertel von Trovn, Her Heinrich von swelnpach, Her Hadmar Richter ze spicz, Ru^etpreht vnd Ditmar von Chv^enzing, Alber von Fu^ert, Wilham vnd Hartpreht pede stvrm, Ortolf von Tanpach vnd Friderich von Tanpach vnd ander vil, di da pei waren. Dicz ist gesehen, do von Christes gepurde waren tousent Jar, Drev Hvndert Jar dar nach in dem fu^enften Jar an sande Gallen tak ze Wilperch in dem Hovse.

Source Fulltext: OÖUB 4 (Wien 1867), S. 493-494, Nr. 529