Ich Rv^eger von Storchenberch vergiche an disem brif allen den, di in sehent vnd horent lesen, di nv sint oder noch chunftik werdent, Daz ich minen Hove dacz Steinechirihen, der mich an minem erbtail angeuallen was her von minen vater vnd von minen vodern, han ze chovffen gege\aben minem Liebem Pru°der johannsen vmbe Hundert phvnt phennig wienner mu^enzz also, daz ich im disen Hove verstatten sol mit aller der stat, vnd ich ze reht sol, vnd sol ovh sein gewer dicz Hoves sein, swa im des durft wirt, als des landes reht ist, vnd der vorbenanten phennig pin ich redlich vnd schon gewert, vnd daz dis wandlung also staet belibe vnd vnuerchert, darv^eber gibe ich in minem pru^eder Jansen disen prief versigelten mit minem jnsigel vnd mit den zivgen, di dapei gewesen sint. Her Heinrich von volchenstorf, Her Chvnrat von Chappelle, Her weychart von Polnhaime, Her Rainpreht sein pru°der, Her Heinrich von Lonstorf, Her Rv^eger der Hv^etoer, Her Aespein, Her Reicher von Perchaim, Chvnrat von sand Go^erigen, Friderich von Tanpach vnd ander vil, di dapei waren. Dicz ist geschehen, do von Christes gepurde waren Tovsent jar Drev Hvndert jar, darnach in dem Sechstem jar an sand Jacobs tage dacz Ebelsperch in dem Hovse.

Source Fulltext: OÖUB 4 (Wien 1867), S. 508-509, Nr. 545