Ich Hainrich hafner und ich Ditrich hafner vnd ich Hertel hafner vnd ich Rudolf maysperger tu^en chunt allen den, di nv sint vnd her nach chu^emftich werdent, die disen brief sehent oder lesen horent, Daz wier mit verdahtem mut vnd gu^etlichem willen aller vnser erben den halben hof datz Chelbersperg haben ze chauffen geben fu^er rehte aigen hern Hainrich von walsse im vnd allen seinen erben ze holtz vnd ze velde, fersuht vnd vnversuht vnd sullen auch des selben vorgenanten gutes sein gewer sin ze hof vnd ze taiding nach landes reht. Wirt aber im daz vorgenant gut fu^erbaz an behabt mit reht im oder seinem (sic) erben, so sey wir im schuldich dreizzieh phfunt phenning vvienner mu^enz wir vnd alle vnser erben, Vnd ist, daz vnder den vorgenanten vieren vnser ainer niht ist, so sullen die drey, die danne sint, dem vorgenanten hern Hainrich von walsse oder seinen erben ein andern gewinnen, der in dem selben gelubde sey, do der vorder ist gewesen, Vnd sol daz geschehen iner vierzehen tagen, ob daz selbe in den vierzehen tagen niht geschiht, so sol auz vns dreyn zwen hintz Amsteten in varen vnd sullen da nimmer auz chommen, vntz ez dem vorgenantem hern Hainrich von walsse im oder seinen erben bestetiget wirt noch alle ir willen. Daz disev red stet vnd vnzerbrochen beleib, geb wir im ze rehter vrchunde vnd aller worhait disen brief bestetiget mit hern Otten insigel von schalach, mit hern Hainrichs insigel von Jesentz, mit hern Albrechts insigel von vihdorf vnd Ditleins insigel von vidorf vnd Alrams insigel von Reikerstorf. Vnd diser red sint gezevg alle, di hye geschriben sint: Der Hainrich der Jesentzer, Der Albreht von vihdorf; Der Leupolt vers, Der Ott von Chuffarn, Der Hainrich von steffenshard, Chunrat schirmer, Chunrad brv^en, Dietrich von vidorf, Ott von Reikerstorf, Ditrich von Reikerstorf, Alram von Reikerstorf, friderich gensel, Vlrich gensel, Walther von meyleinstorf, Chunrat dieminger, Wlfinch von staureting, Chunrat von trisnich, Vlrich brucher, Ott tanhperger, Ruger von zauch, Herman gerber, wlfinch teschelperger, Rudolf teschelperger, Jacob virk, Rembot hinderm holtz, Renhart hinderm holtz, Jacob von Amstetten, Chunrat teyschelman vnd dar zv manich erber man, di da waren, do disev red ergangen ist. Daz ist geschehen do von Christes geburd waren drevtzehen hundert iar, in dem sehsten iar des nasten phintztages vor den phfingsten. Vnd swo der vorgenant hof ansprech oder chriegwer ze taiding wirt, do sol der vorgenant her Hainrich von walsse den vorgenanten hainrichen den hafner selb andern verschosten zehof vnd ze taiding, vnz ez ze ende braht werd.

Source Fulltext: OÖUB 4 (Wien 1867), S. 506-507, Nr. 543