Ich Otte der Hauzenpeche uergich vnd tu^en chunt allen den, die disen prief sehent oder horent lesen, daz ich mit Hainreichs gu^etem willen von Reute, Seiner Hausvrowen vern Perchten vnd aller ierr Erben ze der zeit, do ich ez wol getu^en mochte, meines rechten Aigens den Hof Halbe datz Saluaterre mit allem dem, vnd dar zue gehoret ze holtz vnd ze velde, besu^echt vnd vnbesucht, gesetzzet han dem edeln vnd dem Erbern hern Hainreichen uon walsse vm Sehzich phunt wienner Munzze mit aller der stete vnd man Satzunge setzen mag vnd sol. swaz dem vorgenantem Hern Hainrich uon walsse dar an ab gienge, daz schol er haben auf allev dev, vnd ich han in dem Lande mit beschaidenchait auz genomer rede, swenn ich vnd mein Erben lo^esen mugen vnd wellen, daz sulle wier tu^en an sand Michhelstage. swaz auch her Hainrich uon walsse an dem selben halben Hof pauwet vnd pezzert, daz zwen beschaiden man gesagen mugen mit iern trewen, daz schol er slahen zu den Sehzieh phunden vnd sullen wier im daz allez geben an dem tage der Lo^esunge, alz vo^er gesprochen ist. Dar uber gib ich Otte uon Hauzenpach disen prief ze einem sichtigen v^erchunde vnd ze einem gezeuge geuestent mit meim insigel vnd mit dez Erbern hern Hainreichs in sigel uon folchenstorf vnd hern Jansen in Sigel uon storchenberch. Dez sind gezeuch Her Eberhard uon walsse, Her Alber uon Pilchdorf vnd Her Otte uon Lonstorf, Hainrich uon Husendorf, Reicher sein pru^eder vnd Purchart der mautter, Elbel der walich, Reicher sein pru^eder vnd anderr piderwer Leut genu°ge, die da pey gewesen sind. Daz ist geschehen, do uon Christes gepu^erd waren Tausent vnd drev hundert Jar, dar nach in dem Sehsten jar dez mentags an sand Niclas abent.

Source Fulltext: OÖUB 4 (Wien 1867), S. 512-513, Nr. 550