Cum omnis humana consideratio versari debeat circa cardinem huius finis, quomodo causatum ad suam causam, principatum ad suum principium, creatura ad creatorem, homo ad deum valeat peruenire, tanto via est eligibilior, quanto caucior et securior ad veram anime beatitudinem valet esse ducens directe a deuiis huius mundi in regiam ciuitatem, vbi sunt delicie inexplicabiles ex flagranti intuitu magestatis. Ego Vlricus tunc rector Ecclesie in Fridburch considerans luminosam conuersacionem in splendore bonorum operum fratrum ac dominorum meorum in Plaga beate virginis Premonstratensis ordinis ac Patawiensis dyocesis eisdem me applicans in presenti donaui et appropriaui fratribus et ecclesie memorate sine inpeticione meorum quorumlibet amicorum redditus sev prouentus Curie in Voeuhtenpach, quam titulo pignoris pro viginti et vna librarum Wiennensium possideo, sub hoc pacto videlicet, ut redditus sev prouentus eiusdem Curie, quocumque nomine censeantur, in omnem euentum mihi cedere debeant ad tempora vite mee et post reemptionem, quamdiu pro predicta summa denariorum non fuerint de meo consilio certi redditus comparati, ipsi mihi annuatim in die beati Georij persoluent finaliter duas libras. Preterea in ipsorum Ecclesia pre foribus Capelle beate virginis eligens ac desiderans sepeliri ipsis, siue testatum sive intestatum me contingat decedere, lego et dono ex nunc ob salutem anime mee omnia mea bona, quocumque nomine censeantur, tam in debitis quam in repositis, que nunc habeo et in posterum habere potero deo dante, sine infestacione meorum quorumlibet amicorum hoc excepto, quod quartam partem eorundem omnium mobilium exceptis libris licite possim legare pro remedio anime mee aut alias distribuere quibuscumqe, ob quod Missis ac quibuslibet aliis bonis mei habebunt memoriam in posterum, ut ipsorum conscienciis videbitur oportunum et nichilominus in singularem mei ac ipsorum memoriam et mercedem festa sanctorum Gothardi et beate katherine cum perpetuis hystoriis in ipsorum Ecclesia sollempniter perpetuo celebrabunt maxime cum diebus festiuitatum eorumdem ipsis in solacium ac pietanciam (sic) faciendam die quolibet annis singulis mediam libram procurauerim in presenti. In cuius rei testimonium presentes litteras dedi sigilli domini Jacobi Decani de Horitz et mei proprij fideliter roboratas. Datum anno domini M.CCC°. septimo infra Octauas assumpcionis virginis gloriose.

Source Fulltext: OÖUB 4 (Wien 1867), S. 532-533, Nr. 573