Ortnoeid der Tannberger vergich vnd tvn chunt allen den, di disen brief sehent oder horent lesen, daz vlrich von Gv^enthersperg ein halbez lehen datz woerigantsperg, daz er von mir ze rehtem lehen hat, mit miner hant vnd mit minem willen hat versetzet dem Gotzhaus vnd den pru^edern datz dem Slag fu^er zwelif pfvnt pazzawer pfenning vnd ist daz geschechen, da von Christ gepurd waren Tausent Driuhvndert vnd siben jar an sand Achazen tag vnd sind auch dez geziuge min O^ehaim Chalhoch der volchensteiner, Magenhauser vnd Purchard ze valchenstain, Leb der Rihtter ze Rorbach, vlrich vnd Heinrich die Chirchperger, Chv^enrad der Leikkeb, Gervnch vnd Jordan purger ze velden, Heinrich der amman datz der Chirchen.

Source Fulltext: OÖUB 4 (Wien 1867), S. 524, Nr. 563