Ich Ortneid von Tannberch vnd Mein hausfrav Margaret vergehen vnd tun chunt allen den, di disen prief sehent oder hörent lesen, daz wir mit verdahtem mu°t einen Hof daz voeuhtenpach pei der Chirchen mit allem dem dienst vnd niezze, der von dem selben hof chu^empt, haben versetzet dem Gotzhaus vnd den pruedern datz dem slag fu^er zehen pfunt Pazzawer pfening vnd ist daz geschehen, da von Christes gepurd waren Tausent driu hundert jar, in dem sibentem jar an sand achacen tag. wir sullen auch alain den selben hof lo^esen zwichen (sic) weinahten vnd vasnath vnd sint dez geziuge mein Ohaim Chalhoch der valchenstainer, der Leupolt Purkkgraf ze Morspach, vlreich der Richter ze velden, Heinreich sein prueder, Cunrad der leikeb, Gerunch, jordan, Rupreht Purger datz velden vnd ander gelaebig.

Source Fulltext: OÖUB 4 (Wien 1867), S. 525, Nr. 565