Ich weichart vnd ich vlreich di pru°der van Ramstain wir veriehen vnde tun chvnt allen den, di disen prief an sehent oder horent lesen, di nv lebent vnde her nach chvnftich sint, Daz wir mit gv°tem willen vnd mit verdahtem mv^ete vnde ouch mit gv^eter gvnst aller vnserr erben Haben geben Stephanne van Hohenberch vnd seiner Hausvrowen vron Chvnigvnden vnd allen seinen erben Einen Hof in dem Phenchpache mit alle dev vnde dar zv^e geho^ert versueht vnd vnuersueht fur reht aigen vnd allen ir frumen da mit ze schaffen, ze verchouffen, ze versetzen vnd ze geben, swem si wellen, an allen irresal. Dar zv° so hab wir in geben Einen Cehent pei wilhalmspurch, der gilte fvnftzehen Metzen Chorns vnd Gersten gelicher Getraide, ze rehtem widerwehsel fur den Halben Hof pei sande Cecilien, den man den Groetzhof da nennet. wir setzen vns ouch Stephanne van Hohenberch vnd seiner Hausvrowen vron Chvnigvnden vnd seinen erben des vorgenannten Hofs in dem phenchpache vnd des vorgenanten Cehents ze rehtem Scherm vnde ze Gwern fvr alle ansprach, als Landes reht ist vnd gewonhait in Osterriche. Nement si aber dar vber dehainen schaden mit reht an dem vorgenanten widerwehsel, den schul wir in ab tu°n, er sei groz oder chlain, vnd loben daz mit gv^etem willen an disem prief. Daz diseu rede vnde diser widerwehsel also staet vnd vnzebrochen beleibe, dar vber so geb wir Stephanne van ho^ehenberch vnd seiner Hausvrowen vron Chvnigvnden vnd seinen erben disen prief versigelt mit vnsern jnsigeln zv einem sihtigen vrchvnde vnde zv einer staeten sicherhait diser sache vnd sint der rede Gezeuge Her Otte van zelkinge, Her Chvnrat van arnstain, Her Chvnrat vnd Her jacob van pilchdorf, Her alber van Mainberch, George van weizzenberch, Dietreich van wildekke vnd ander piderbe Leut genvege, den disev sache wol chvnt ist. Ditz ist geschehen vnde der prief geben datz wilhalmspurch, do van Christes Geburt waren ergangen dreutzehen Hvndert iar vnd dar nach in dem Sibenten iar an sande Merteins tage.

Source Fulltext: OÖUB 4 (Wien 1867), S. 534-535, Nr. 575