I Christan von Wolfsegge vergih an disem brief vnd tu°n chunt allen den, di disen brief sehent oder horent lesen, Daz ich mit verdachtem mu°t vnd mit zitigem rat miner erben vnd miner frevnt dem hochgeborn fu^ersten minem genedigen herren hertzog friderichen von o^esterrich di zwen hof an dem pirchelwang, di ich von im zelehen gehabt han, auf geben han vnd hab in gebeten, daz er daz selb lehen den erbern levten Heinrichen dem pu^echsen vnd siner hovsvrowen Dyemu°ten vnd Otten ir beider sun, den ich ez recht vnd redlich verchovft han, geru°cht ze verlihen vnd wil ouch desselben gutes mins herren des hertzogen rechter scherm vnd gewer sein fu^er alle ansprach nah des landes recht vnd gewonheit vnd gib dar vber disen brief ze einem vrchund diser sach versigelt mit minem hangunden jnsigel. Der brief ist geben ze Steyr nah Christes geburd vber drevzehen hundert jar darnach in dem vierzehendem jar an dem palmtag.

Source Fulltext: OÖUB 5 (Wien 1868), S. 126, Nr. 125