Ich wolfker der PernRevter vnd mein Havsvrowe ver Osann vnd vnser erben veriehen vnd tvn chunt allen den, di disen prief ansehent oder ho^erent lesen, di nv lebent vnd her nach chvnpftich sint, Daz wir mit gesampter hant vnd mit verdohtem mvet vnd mit gvetleichem willen aller vnser erben vnd ovch ze der zeit, do wir ez wol getv°n mahten, haben ze chovffen gegeben Meinharten von wiermla vnd seiner Hausvrowen vern Chvnigvnten vnd ir paiden erben Ein Mv°le, di do leit ze Aino^ett pei der Traisem, mit alle dem nvtze vnd dar zv gehort, versveht vnd vnuersueht, swi so daz genant ist, vmb viertzich phunt phenning wienner gemainer mvnze, der wir schon vnd redleich gewert sein vnd dient man van der selben Mv°le alle iar zwen Mv°tte Chorns vnd Sehs Schilling phenninge der vor genanten mvnze an sand Merteins tag vnd ein Gans vnd zwai Hvenrr. Dar vber so setz ich mich vorgenanter wolfker der PernRevter vnd mein Sweher Choloch der Hoekchel ze Scherm Meinharten von wiermla vnd seiner Hausvrowen vern Chvnigvnten vnd im erben der vor genanten Mv°le fur alle ansprach, als des lants reht ist in Osterrich, vnd swo wir in des Scherms ab gesten, daz schuln si haben ovf alle de, vnd wir haben in dem Lande ze Osterriche. Daz disev rede also staet vnd vnzebrochen beleibe, Dar vber so gib ich wolfker der PernRevter vnd mein Sweher Choloch der IIaekchel Meinharten von wiermla vnd seiner Hausvrowen vern Chvnigvnten vnd ir paiden erben disen prief versigelten mit vnser paider jnsigeln zv einem offenn vrchvnde vnd zv einer staetten sicherhait diser sache vnd sint der rede gezevge Her Chunrat van Arnstain, Her Chunrat von Tyrnstain, Her Gundakcher von Retelnperg, Her Olber von Go^etzeinsdorf, Her wernhart von Nvzdorf, Alram in der aw, Chunrat der Roezzinger von aino^ett vnd ander piderbe leut genvech, den disev sache wol chund ist. Der prief ist gegeben datz Hertzogenwurch, Do von Christes geburt warn ergangen Tausent iar, Drevhundert iar vnd darnach in dem Ohtzehenten iar des nehsten Svntags vor den Phingsten.

Source Fulltext: OÖUB 5 (Wien 1868), S. 220-221, Nr. 223