Ich Perht die verberinne Chunrades des Verber witib, dem Got gnad, vnd meinev Chind pedev sv^en vnd Tohter wier vergehen vnd tu^en chunt allen den, die disen brief sehent oder ho^erent lesen, die nv lebent vnd her nah chu^emftich sint, Daz wir wol bedaht vnd mit gu^etem willen die Mu^el dacz sanct Christein vor der Stat ze Ens mit alle dev, vnd dar zu^e geho^ert ze holtz, ze veld, gestift vnd vngestift, besüht vnd vnbesüht haben verchouft vnd geben dem edlem Herren herm Heinrich von walse Houbtmann datz Ens vnd allen seinen Erben vmb zwai min sehzich phunt phenning wienner mu^ensse, der er vns genczlich vnd schon verriht hat vnd gewert, Wir su^ellen ||
vnd wellen auch der selben Mu^el des vorgenanten hern Heinrich von walse vnd aller seiner Erben scherm vnd Gwer sein an aller stat nah Landes reht. Vnd dar vber geben wir dem vorgenantem herm Heinrich von walse vnd allen seinen Erben disen brief ze einem sichtigem vrchu^ende mit dem Gemainem Insigel der Stat vnd der erbern purger ze Ens bestetet vnd geuestent. Der brief ist gegeben, do von Christes Gepu^ert sint ergangen vnd gewesen driuzehen hundert iar, dar nah in dem Ahzehendem iar an sanct Vrbans tach.

Source Fulltext: OÖUB 5 (Wien 1868), S. 218-219, Nr. 221