Ich Ru°precht von Lechperch vergihe offenleich vnd tu°n chunt Allen den, die disen brief sehent, ho^erent oder lesent, Daz ich herm Otten von volrers verchauft han Achtzehen march geltes ane dreizzich phenninge vmb anderthalb hvndert march agleyger phenninge fu^er recht aygen vnd ist daz selbe gu°t gelegen in dem Rastal ze Rêpplach vier hu°ben, ze Pograd zwo, fu^emf ze Selbach, ze Dragositzach drej, ze vrcznach aine, ze Po^ego^eriach aine, auf dem Gereut aine, jn dem Langendorf aine, ze feustritz aine vnd ze Huntsdorf aine, vnd han daz getan mit meiner Hausfrowen hant vrowen Chvnegvnten vnd vnser erben vnd auch mit irem gutem willen vnd auch mit der gvnst vnd geshefte vrowen Kathreyn vnd vrowen Agnesen meiner gesweien, die ez mitsamt mir auf geben habent dem vorgenantem herm Otten von volrers vnd seiner hausfrowen vrowen Alheyten vnd iren erben, leut vnd gu°t, stok vnd stain vnd allez, daz dar zv° geho^ert mit allem dem recht, alz ez mein Sweher Her Ru°dolf von Tas inne gehabt hat dem Got gnade, vnd ez mich auch vnd meine hausfrowen die vorgenanten von im an erbet, vnd gelob im daz selbe gu°t ze schermen ich vnd meine erben im vnd seinen erben fu^er recht aygen vnd fu^er alle ansprach nach landes recht. Têt ich des nicht, swelhen schaden er des neme, den er bei seinen trewen gesagen mo^echte, den schol ich vnd mein erben im vnd seinen erben ablegen vnd sol er daz haben vnd sein erben auf mir vnd auf allem dem, vnd ich han. Dar v^eber ze ainem vrchv^ende gib ich im disen meinen offen brief mit meinem anhangentem insigel vnd mit den frumen getzeugen, die hie geschriben stent: Her vlreich von Liebenberch, Dietmar von weizzenek, Her Bartholome pharrer ze fu°rentz, Nycla an der Tra vnd sein aydem Nycla vro^eleich, Nygrin, die burger ze villach vnd andere frume leute, wir vlreich von Liebenberch vnd Dietmar von weizzenek vergehen, daz wir dises gewerfes getzeugen sein vnd haben vnsere insigel an disen brief gehangen ze einem vrchv^ende der warhait. Diser brief ist geben, do von Christes geburt ergangen waren dreutzehenhvndert iar, dar nach in dem Achtzehenten Jare des nehesten mitchens vor svnbenten.

Source Fulltext: OÖUB 5 (Wien 1868), S. 221-222, Nr. 225