Ich Chvnrad von Scherenstayn Vnd ich Chunrad sein svn Vnd ich Gvndakcher sein svn tuen chvnt alle den, die disen prief lesent oder horent lesen, die nu lebent oder hernoch chvmftig werdent, Daz wier mit vnser Erben guetem willen vnd gvnst Vnd ze den zeiten, do wier iz wol getuen machten verchowft haben vnsers rechten Aygens ein Mvl, di do leit vnder Dachsperich an dem Gaylspach, di do dient wol svben schilling phenning, vmb sechtzehen phvnt phenning Wienner Mvnzze, der wier redleich vnd recht gewert sein, Den Erbern Herren hern Eberharten vnd hern Wolfkern von Dachsperch vnd allen iern Erben furbaz freilich ze haben vnd all iern frvm domit schaffen, verchowfen vnd ze versectzen vnd geben, swem se wellen an allen iersal. Vnd dorvber durich pezzer sicherhait so setz ich mich Chunrat von scherenstayn vnd Chunrat mein svn vnd Gvndakcher mein svn ze rechtem scherm fu^er all ansprach, als aygens recht ist vnd des lands recht ze Osterrich . ob in furbaz mit recht an dem vorgenanten guet icht abgieng, Daz schvllen se haben ouf vns vnd ouf alle dem, vnd wier haben in dem land ze Osterrich. Vnd geben in dorvber vnsern Prief versigelten mit vnsern jnsigel Vnd mit hern Eberharts jnsigel von Walse ze den zeiten Howptman ob der Ens Vnd mit hern Andres jnsigel von Svnnberch, di diser sach zeug sint mit ier jnsigel vnd ander Pider lewt genueg, den dise sach wol chvnt ist.

Source Fulltext: OÖUB 5 (Wien 1868), S. 279-280, Nr. 289