Ich Chv^enrat der Havser vergich vnd tven chvnt allen den, di disen prief lesent oder ho^erent lesen, di nv lebent vnd her nach chvnftig sind, daz ich mit verdahtem mvet vnd mit meiner vreund rat vnd mit meiner erben Chalhohes, Chu^enrates vnd Nyclas gveten willen meiner havsvrowen vron Agnesen gegeben han ledichleich sehtzig phvnt phenning wienner mu^enzz avf dem lavn hove in dem innren veld vnd han daz getan, do ichz wol getven moht, also beschaidenleich, daz si den selben hove in nvcz vnd in gwer haben schol an allen chrieg vnd an allev ansprach als lang, vncz ob mein vorgenanten gerben Chalho^ech, Chv^enrat vnd Nyclas den selben hove von ier lo^esen wolden, so schol si in den vorgenanten hove ze lo^esen geben vmb di vorgenanten sehczig phvnt phenning wienner mv^enzz an alle wider red . wer aver daz, des got nicht geb, daz mein egenantev havsvrowe vro Agnes verfv^er an geschaefte, so schol der selb hove meinen vorgenanten gerben Chalhohen, Chv^enraten vnd Nyclasen mit ein ander gevallen ze gleichem tail. Daz disev red staet vnd vnuerchert beleib, gib ich ier disen prief versigelten mit meinen insigel vnd mit Dietreichs des harvcher insigel vnd mit meins svns Chalhohes insigel. Der red sint avch gezevg her Chalhoch von pernaw, Busck der harvcher, vcz der schaffer, Christan hern herworts svn, Albreht der walpot vnd sein pru^eder vlreich, Chv^enrat der zink vnd sein aidem Chv^enrat, Chv^enrat der semleinsmaendel, Eberl der pech, walchv^en an dem marcht, Albreht der vrei vnd anderr pideber laevt genv^eg. Der prief ist gegeben, do von christes gepvrd ergangen waren drevzehen hvndert iar vnd dar nach in dem zwaintzkistem iar an dem prehen tag.

Source Fulltext: OÖUB 5 (Wien 1868), S. 257-258, Nr. 266