Ich Ruger der Piber Tun chunt allen den, di disen prief sehent oder ho^erent lesn, paide den gegenburtigen vnd ouch den chunftigen, daz ich mit wol verdachtem mu^et mein selbs vnd mit gutem willen meiner housfrown vron Diemu^eten vnd meiner paider sun Vlreichs vnd Arnolts vnd mit gunst meines Aydems Vlreichs des freien vnd seiner housfrown Margareten vnd aller meiner erben zeitigen rat mit gesamter hant zo der zeit, do ich ez wol getu^en mochte, verchoufft han meins rechten aigens vnd meins getailten gu^ets di mul datz Gruenberch, di alle iar zwai pfunt pfeninge dient, vnd aein hofstat da selbs, di funfzch pfanninge dient, dem erbern Mann Almarn dem hof richter von fuchsperch vnd seiner housfrowen vnd seinen chinden vmb dreu vnd viertzch pfunt wienner pfenninge, der ich aller gentzleich gewert pin, also beschaidenleich, daz er den vorgenanten dienst alle iar an sant Michels tag in nemen schol, wand er aber aigens geno^ez nicht ist, darumb hat er mit meinem gutleichen willen des selben gu^ets aigenschaft geselt ouf daz chlo^ester hincz sant Bernhart also, daz er oder swer ez nach im hat, von demselben gu^et hincz demselben gots haus alle iar zwelif pfenning dienen schol an dem vorgeschriben tag vnd darumbe han ich vnd mein vorgenante housfrow mit allen meinen vorgeschriben erben deuselb aygenschaft louterleich vnd ledichleich oufgegeben demselben chlo^ester hincz sant Bernhart in ver Elspeten der aptessinn hant vnd pru^eder Gregorij hant, der ze den zeiten Schaffer waz, mit allem dem recht, vnd ich diselb aigensehaft von meinen voˆrvoˆrn her gehabt vnd praeht han, vnd lob ich mit samt meinen sunn paiden Vlreichen vnd arnolten vnd ich vlreich der freij dem offt genanten chlo^ester ze sant Bernhart di e geschriben aigensehaft freien vnd schermen fu^er alle ansprach, als des lands recht vnd gewonhaeit ist in osterreich also, swaz si daran schaden nement mit rechtem recht, den schulten wir in ablegen an alle arig lisstte . vnd daz diseu red also stet vnd vnzeprochen beleib, darumb han ich der offt genanten Samnunge ze sant Bernhart disen prief gegeben zu aeinem warn v^erchund versiglten mit meinem insigel vnd mit meins aydems insigel vlreichs des freien vnd darzu^e mit dem insigel meins herren hern vlreichs von Meissow. Gezeug diser ding sint mein herren paid Graf perchtolt vnd Graf purchart von hardekk, her Hadmar der Sunnberger von Schounstaein, her wetzel von drezsedl, her Hainreich der pernhartstorfer, Hainreich von Dachpach, Gotschalch von fro^enhofen vnd sein pru^eder Reinbot von peugen vnd anderr frumer leut genu^eg. Ditz dinch ist geschehn datz fuchsperch ouf dem hous, vnd der prief ist gegebn nach christs gepu^erd uber dreuzehn hundert iar, darnach in dem zwaintzchistem iar an aller hailigen abent.

Source Fulltext: OÖUB 5 (Wien 1868), S. 273-274, Nr. 283